amalinks wokungena

Breaking News

'Onozindaba Kumele Bethule Indaba Zamabandla Ancintisa Kukhetho Oluzayo'


Ngesikhathi amabandla ezombusazwe eseqinisa imikhankaso yawo yokhetho oluzayo eZimbabwe, abezindaba sebekhuthazwe ukuthi baphe ithuba elaneleyo emabandleni wonke abhalisele ukuncintisa ukhetho lwalonyaka.

Sikhathi sonke nxa kulokhetho eZimbabwe, amankampani abezindaba awomphakathi agoqela iZimbabwe Broadcasting Corporation ahleli esetheswa umlandu wokwenza sengathi ziyimisakazo yebandla elibusayo ele Zanu PF.

Le yinto amabandla azancintisa lonyaka athi akhangelele ukuthi iphele du, ikakhulu nxa kukhangelwa ukuthi uMongameli Emmerson Mnangagwa usethembise kanenengi ukuthi uhulumende wakhe ufuna ukwenza izinto ngendlela ehlukileyo.

Ngokutsho kwekomishini yezokhetho eZimbabwe, kulamabandla edlula ikhulu (108) abhalisele ukuncintisa ekhethweni lwalonyaka.

Unobhala jikelele webandla leUnited Democracy Movement, uMnu. Andrew Nyathi, uthi abezindaba ikakhulu amankampani omphakathi balomlandu wokubika ngemikhankaso yawo wonke amabandla la. Uthi akusimlandu wabezindaba ukwahlulela ukuthi yiliphi ibandla elithandwa ngabantu kumbe hatshi kodwa abantu kufanele baphiwe ulwazi bazikhethele.

“Kuyadingeka ukuthi ama political parties aphiwe iplatform or indima elinganayo yokuthi kubonakale lapha abalima khona ukuthi kunjani abantu bazikhethele bona bodwa njalo abantu bazijajele bona bodwa ukuthi hayi lokhu kuhle lokhu kakukuhle.”

UNyathi uthi kunengi abakukhangelele emsakazweni yomphakathi ngalesi sikhathi sokhetho.

“Akasipheni abanye labo ichance yokuthi labo bake bazicacade sizwe ukuthi labo bathini ukwenzela ukuthi umsebenzi wesizwe uhambe kuhle. Umsebenzi wokuthuthukisa isizwe ube muhle so that ilizwe leZimbabwe lithuthuke.”

Ngokutsho kwemithetho yokhetho evunyelwene ngamazwe eSADC, wonke amabandla aphatheka ekhethweni kufanele aphiwe ithuba lokwethulelwa inhlelo zawo ngamankampani okuzasaka awomphakathi.

Banengike okwakhathesi asebetshayele izandla umsakazo weZBC kanye lephephandaba leHerald ngokwethula indaba zokhetho ngendlela esuthisayo ikakhulu yeminkankaso yomanyano weMDCT Alliance leZanu pf. Kodwake amabandla amancane athi lokhu akwenelanga njengoba abezindaba laba bekhangela kuphela inhlelo zamabandla amakhulu bona betshiywa phandle.

uMgcinisihlalo webandla le ZAPU kwele South Africa, uMnu. Bongani Halimana, uthi kusegcekeni ukuthi imisakazo yomphakathi ilokhe ithatha icele kwezokwethulwa kwemibiko ephathelene lokhetho.

“Sibonile isikhathi esidlulileyo ibandla leZAPU limatasatasa kumaconstituences koBulawayo laseMatabeleland South laseMatabeleland North likhankasa lisenza i door to door. Asizange salibona kumabonakude njalo asizange salizwa lisakazwa kumaradio.”

Le yinto athi kufanele iphele. “Konke lokhu kwenziwa yikuthi iConstitution yelizwe, isisekelo sombuso selizwe asilandelwa futhi njalo asihlonitshwa. NjengeZAPU siyakhuthaza ukuthi uhulumende obusayo akahloniphe isisekelo selizwe. Akahloniphe lokhu okwavunyelwana ngabantu ngo 2013 kwafakwa kusisekelo selizwe.”

Umncwaningi enhlanganisweni yeChris Hani Institute, uMnu. Samukele Hadebe, uthi kucace bha okufanele kwenziwe ngonozindaba ngesikhathi sokhetho.

“Balomlandu hatshinje owokubika ukuthi lapha kwenzakala lokhu lapha kwenzakala lokhu kodwa ekuvezeni okuyikho okufanele kwenzakale nxa kungenzakali kuhle. Kambe zonke izinto eziyimfanelo ezokuthi kube lokhetho olumgceke, olungazukuba lengxabano lempikiswano zikhona na.”

UHadebe uthi abeZindaba balomlandu wokungathathi hlangothi nxa bebika indaba zokhetho. Lokhu uthi bakwenza ngokubika indaba ezenzakalayo kumbe ezemikhankanso ngendlela ezakwenza uzulu azikhethele yena ibandla elimkhanga ngcono engazange atshotshozelwe ngabezindaba laba.

“Balomlandu wokupha bonke abancintisa kulolukhetho amathuba alinganayo ukuze uzulu ekhethe ngoba ezwile ukuthi bameleni njalo bathini. Kanengi kanengi sihlala sisola sisithi thina bavame ukuba lugatsha lwebandla elibusayo. Ngaleyo ndlela akwakhi isizwe, kuletha ingxabano.”

Amabandla amancane athi abakumeleyo, abafuna ukukwenza benganqoba, abafuna kuguqulwe, umehluko wabo lamabandla avele esekhona lemibuthano yabo yeminkankaso ngezinye zezinto abafuna abezindaba bazethule emphakathini.

Udaba Esilethulelwe NguBenedict Nhlapho
please wait

No media source currently available

0:00 0:04:31 0:00

Facebook Forum

XS
SM
MD
LG