amalinks wokungena

Breaking News

'Ukususa Amalunga Edale leCabinet Akusoze Kuvuselele Umnotho weZimbabwe'


uMnu. Tshinga Dube (osekucineni lapha esandleni sokunxele) ususwe esikhundleni sakhe sokukhangela inswelo zabalwa impi yenkululeko.
uMnu. Tshinga Dube (osekucineni lapha esandleni sokunxele) ususwe esikhundleni sakhe sokukhangela inswelo zabalwa impi yenkululeko.

UMongameli Robert Mugabe ngoMvulo uguqule idale lakhe labampathintambo eleCabinet wabuyisela abaphathintambo abalitshumi, wafaka abayisificaminwe mibili abatsha, waxotsha abathathu, okutshiye izizalwane zeZimbabwe zingajabulanga ngenyathelo leli zisithi alilethi nguquko ekuqedeni ubunzima obubhekane lelizwe.

Abasuswe ezikhundleni abakade bekuzo besiwa kwezinye, nguMnu. Ignatiuos Chombo, osebona ngezemali, uMnu. Patrick Chinamsa osebona ngezebulenjini, uMnu. Walter Muzembi, osebona ngezobudlelwano lamanye amazwe, uMnu. Obert Mpofu, osebona ngendaba zasekhaya, uMnu. Simbarashe Mumbengegwi osengezokutshala imali, uMnu. Patrick Zhuwawo osebona ngezemisebenzi yelizwe, uMnu. Simon Khaya Moyo osebona ngezokwethulwa kwemibiko, loMnu. Christopher Mushowe osezabona ngokutholisa abafundi imali yesikolo.

Abatsha abangenilyo nguMnu. Edgar Mbwembwe osebona ngezokwethekelwa kwelizwe, uMnu Happyton Bonyongwe osekwezemithetho, uMnu. Cain Mathema usebona ngezabalwa impi yenkululeko, uNkosikazi Chiratidzo Mabuwa ungene kwezabatsha, uNkosikazi Thokozile Mathuthu, usengusibalukhulu weMatabeleland North, eMashonaland Central kungene uMnu. Webster Shamu kuthi eMasvingo kungene uMNu. Paul Chimedza.

Abaphunyisiweyo nguNkosikazi Prisca Mupfumira, uMnu. Faber Chidarikire loMnu. Tshinga Dube. Umsekeli kamongameli uMnu. Emmerson Mnangagwa osethathelwe isikhundla sokuba ngumpathintambo wezemithetho.

Abalwa impi yenkululeko basole kakhulu ukukhitshwa kukaTshinga bethi kubuyisela muva inhlelo akade eseziqalile ezibalisa iBill yabalwa impi yenkululeko, lokuhlolwa kwabo kutsha ukuthi bangena njani kuhlelo lokugcinwa nguHulumende abanye babo bengayanga lkuya empini.

Unobhala jikelele weZipra Veterans Association, uMnu. Petros Sibanda, uthe kathokozi ngokuxotshwa kukaDube ngoba kukhombisa ukuba udaba lwabo luyahlala lungalungiswanga.

Osakhulayo, uThando Gwinji, usole kakhulu umphathintambo, uNkosazana Chiratidzo Mabuwa, ethi ukhulile njalo izifiso zabo zihlukile ethi bafuna ukuzimela ngabe kufakwe umuntu onguntanga ozazwisisa indingeko zabo.

Olwela amalungelo oluntu, uMnu. Mbuso Fuzwayo, uthe inguquko ekhona ayilethi nzuzo omele aphume ngumongameli.

Inengi lenkokheli zihlalele evalweni ukuba ukuxotshwa lokuguqulwa kwezikhundla kungaqhubekela phambili. Inengi labantu lijabulele ukwemukwa kukamsekeli kamongameli uEmmerson Mnangagwa isikhundla sokuba ngumphathintambo wezemithetho bethi ubesezitshela kakhulu etshengisa ukuba usefuna ukubusa kumbe ukuvukela umbuso okhona. Abanye ngabakade bebona angathi ulakho ukukhitshwa lasesikhundleni sokuba ngumsekeli kamongameli.

XS
SM
MD
LG