amalinks wokungena

Breaking News

ZCTU: Sizimisele Ukutshengisela Ngenkani Emigwaqweni Sisole Okwenziwa Nguhulumende


UTirivanhu Marimo, okuhlangothi lwabatsha kunhlanganiso yeZCTU, lomongameli we ZCTU uMnu. Peter Mutasa.

Inhlanganiso yeZimbabwe Congress of Trade Unions ithi ukutshengisela emigwaqweni kusasa yiyo yodwa indlela yokwenza ukuthi uhulumende alalele izisebenzi.

Inhlanganiso le ithi isakhuluma lamalunga ayo kulandela okwethulwe ngamapholisa athi akumelanga kutshengiselwe emigwaqweni ngenxa yokuthi kungamemetheka umkhuhlane wesihudo osubulele abantu phose abafika amatshumi amahlanu.

UMnu. Peter Mutasa, okhokhela iZCTU, uthi bazinikele ukungena emigwaqweni loba bengavunyelwa ngamapholisa.

UMutasa uthi sebedinge igqwetha elizabamela kudaba lolu nxa amapholisa engangenela ekutshengiseleni kwabo.

UMnu. Ambrose Sibindi, omele inhlanganiso yeZCTU eMatabeleland ezinye indawo, uthi ukutshengisela yiyo inkundla yokwethula inhlupho ezibhekane lezisebenzi.

USibindi uthi uhulumende kaMongameli Emmerson Mnangagwa waguqula umthelo we-electronic money transfer tax engakhulumisananga lezisebenzi.

Lokhu kusekelwa nguDokotela Nkululeko Sibanda, isikhulumeli sikamongameli weMDC, uMnu. Nelson Chamisa. Uthi uChamisa kalani lokugugudeka komnotho welizwe leZimbabwe njalo langomthelo owethulwe nguMnu. Mthuli Ncube, umphathintambo wezemali.

Kodwa-ke uMnu. Dingumuzi Phuthi okubandla leZanu PF uthi abaphikisayo yibo ababasela ukuthi kube lokuxabana elizweni leZimbabwe njalo lokugugudeka komnotho.

UNkosikazi Rosemary Siyachitema, umqondisi weConsumer Council of Zimbabwe, uthi kuqakathekile ukuthi uhulumende akhulumisane labantu ngokubahluphayo.

Ibandla leZanu PF licabangela ukuthi abaphikisayo bakhulumisana leziphathamandla zamanye amazwe okwenza ukuthi kubelokuxokozela eZimbabwe kulandela ukhetho olwenziwa ngoNtulikazi. Abaphikisayo bathi ibandla leZanu PF kalikwazi ukubusa. Loba kunjalo, uPhuthi uthi kumele abantu bajabulele ukuthi kukhona okunye okwenziwa nguhulumende okuzanceda uzulu.

Akwaziwa ukuthi inhlanganiso yeZCTU izangena emigwaqweni kumbe hatshi kusasa ikhonona ngomthelo omutsha, ukubhidlika komnotho lokunye okufanayo.

Udaba Esilethulelwe NguGibbs Dube
please wait

No media source currently available

0:00 0:07:30 0:00

Facebook Forum

XS
SM
MD
LG