Ibandla le MDC elikhokhelwa nguMnu. Morgan Tsvangirai lithi kalisoze lamukele uluhlu lokusetshenziswa kwemali yelizwe olwe national budget yomnyaka ozayo njengoba uhulumende engakhulumisananga lozulu ngodaba lolu.
UNkosazana Dorcas Sibanda okukhomithi ebona ngokusetshenziswa kwemali yelizwe uthi bekumele uhulumende akhulumisane lozulu ngodaba lolu njengalokho okubhalwe kusisekelo sombuso welizwe.
UNkosazana Sibanda uthi idale lephalamende selibike ukuthi kalisoze lixoxisane lozulu ngalokhu njengalokho okwenzakala mnyaka yonke.
Umsekeli wesikhulumeli sezembiko kubandla le Zanu PF, uMnu. Psychology Maziwisa, uthi kuyafunakala ukuthi abantu makhaza bethule imbono yabo ngoluhlu lokusetshenziswa kwemali yelizwe.
Kodwa-ke uthi lokhu okukhulunywa libandla le MDC-T yikuchitha isikhathi njengoba lingelalutho lokutshela uzulu.
Umphathintambo wezemali, uMnu. Patrick Chinamasa, ukhangelelwe ukuthi uzakwethulela uzulu ekupheleni kwenyanga le okumumethwe yibudget yomnyaka ozayo.
Ilizwe libhekane lobunzima bokudinga imali yokwenza inhlelo ezitshiyeneyo njengoba kungelamankampani amanengi avula amabhizimusi kwele Zimbabwe.
Akesizwe uNkosazana Sibanda exoxa ngokukhulumisana lozulu ngoluhlu lokusetshenziswa kemali yelizwe loGibbs Dube weStudio 7.