amalinks wokungena

People's Rainbow Coalition: UJoice Mujuru Uzancintisa Kukhetho Lukamongameli ngo2018

  • Gibbs Dube

Amalunga omanyano wePeople's Rainbow Coalition asekhethe uNkosikazi Joice Mujuru ukuba ancintise ukhetho lukamongameli ngomnyaka ka2018.

Umanyano osanda kubunjwa owe People’s Rainbow Coalition usukhethe uNkosikazi Joice Mujuru, owayengumsekeli kaMongameli Robert Mugabe engakaxotshwa kubandla leZanu PF, ukuthi ancintise kukhetho lukamongameli oluzakwenziwa ngomnyaka ozayo.

Lokhu kwethule ngoLwesihlanu ngumanyano lo olamabandla agoqela eleNational People’s Party elikhokhelwa nguNkosikazi Mujuru, iDemocratic Assembly for Restoration and Empowerment, Zimbabweans United for Democracy kanye lecele lePeople’s Democratic Party elikhokhelwa nguNkosikazi Lucia Matibenga.

Ekhuluma ngesikhathi esanda kukhethwa ngumanyano lo, uNkosikazi Mujuru uthe kumele baqalise ukukhanga abantu ukuthi babhalise kugwalo lokuvota kuhlelo lweBiometric Voter Registration olwenziwa yikhomishini yeZimbabwe Electoral Commission (ZEC).

Uthe lokhu yikho okungenza ukuthi bakhethwe ngabantu kukhetho oluzayo.

Uphinde wathi, “Sifisa ukuthi iZEC, inhlanganiso ezizimele zodwa, amabandla enkolo ezitshiyeneyo lamaphepha lemisakazo bakhuthaze abantu ukuthi babhalise ukuvota ngobunengi babo.”

UNkosikazi Mujuru ugcizelele esithi kumele umanyano lo ukhuthaze ukuthi kube lokuthula elizweni ukwenzela ukuthi kubelokhetho olukhululekileyo njalo oluhlonitshwa ngumhlaba wonke jikelele.

UNkosikazi Mujuru waxotshwa kubandla le Zanu PF ecatshangelwa ukuthi wayefuna ukususa uMugabe esikhundleni okungekho emthethweni. Wathi lokhu kungamanga aluhlaza tshoko ngoba kulokulwisana okumangalisayo kubandla leli kubangwa ukuthi kudingwe umuntu ongangena esikhundleni sikaMugabe oseluphele.

Kulomunye umanyano wamabandla aphikisa elibusayo obizwa ngokuthi yiMovement for Democratic Change Alliance olamabandla agoqela eleMDC-T ekhokhelwa nguMnu. Morgan Tsvangirai, MDC (Professor Welshman Ncube), People’s Democratic Party (Tendai Biti), Zimbabwe People First (Agrippa Mutambara), Transform Zimbabwe (Jacob Ngarivhume), iMultiracial Christian Democrats leZanu Ndonga.

Akwaziwa ukuthi kozalwa nkomoni kukhetho oluzayo!!

Facebook Forum

XS
SM
MD
LG