amalinks wokungena

Breaking News

Okwenziwa Ngamasotsha eHarare Kusikhumbuza Umbhuqazwe weGukurahundi


Inhlamvu ezasetshenziswa ngamasotsha eHarare ...

Inengi labantu eZansi yeMaNdebeleni lithi ukubulawa kwabantu bedutshulwa esigodlweni kubethusile njalo kwabakhumbuza isikhathi sombhuqazwe weGukurahundi. UAlbert Ncube usipha loludaba ngokugcweleyo.

NgoLwesibili iZimbabwe izananza usuku lwabezomvikela olweDefence Forces Day kodwa lonyaka luza ngesikhathi uzulu ekhonona ngokuziphatha kwebutho eladubula abantu abayisikhombisa bafa ababetshengisela esigodlweni eHarare bekhonona ngempumela yokhetho.

Inengi labantu esabelweni seMatabeleland South lithi ukubulawa kwabantu kusetshenziswa imbhobho kubatshiye bethithibele njalo kubakhumbuza isikhathi sombhuqazwe weGukurahundi lapho abantu ababulawa khona kabuhlungu.

UNkosazana Julieth Nkiwane, umqondisi wenhlanganiso esebenzelana labomama bemaphandleni eyeWomens Development Association of Zimbabwe, uthi inyathelo lebutho litshiye izakhamizi zithithibele.

Amazwi akhe agcizelelwe nguMnu. Ekem Moyo, isikhulumeli sebandla leMDC-T ekhokhelwa nguMnu. Nelson Chamisa eZansi yeMaNdebeleni, othi bekungadingakali ukuthi ibutho lisebenzise imibhobho.

UNkosazana Nokuthula Mauba, isakhamuzi seGwanda, uthi uzulu akumelanga ethese ibutho icala ngoba livele lisebenza ngokuthunywa. Uthi kumele kudingwe owathi ibutho lingene emigwaqweni lidubule abantu.

UMnu. Patrotic Ndlovu, esinye sezakhamuzi zeGwanda, uthi ukudutshulwa kwabantu libutho kubisela muva imizamo kahulumende yokukhumisana umlotha lozulu wakuleli.

UMongameli Emmerson Mnangagwa ukhulumile phambilini ukuthi uzasungula ikomishini ezimeleyo ezadingisisa okwenzakala eHarare.

UMnu. Edgar Ncube, oweSimbuka eGwanda, uthi iseseminengi imbuzo ezafuna impendulo.

Ibutho lakuleli lajabulelwa ngabanengi nyakenye ngoLwezi ngesikhathi lisusa uMnu. Robert Mugabe esihlalweni kodwa okwamanje uzulu ulikhomba ngeminwe elethesa umlandu wokubulala abantu kungela sizatho.

Udaba Esilethulelwe NguAlbert Ncube
please wait

No media source currently available

0:00 0:04:17 0:00

Facebook Forum

XS
SM
MD
LG