amalinks wokungena

Abantu abanengi eZimbabwe bathi bayadubeka okumangalisa njengoba inengi labo lilala phandle kwamabhanga limelele imali osokulilihlo lentwala.

Abanye kabasenelisi ukuthenga ukudla kwemmuli kumbe ukubhadala imali yalapho abahlala khona.

Inengi seliphila ngokuboleka imali kubomatshonisa. Omunye walabo abathi bathwele nzima nguNkosikazi Rejoice Ngwenya ophila ngokuthenga ethingisa impahla ezitaladini.

UNkosikazi Ngwenya uthi kasenelisi lokubhadala imali yalapho ahlala khona ngenxa yokusilela kwemali.

Omunye njalo othwele nzima nguMnu. Tapiwa Moyo, isakhamuzi sakoBulawayo.

Ilizwe leZimbabwe lisanda kubika ukuthi lenelise ukuthola imali eyedlula kancane leyo ekade ikhangelelwe ukuthi lingayithola ekuqaleni komnyaka engena esikhwamani sikahulumende.

Kodwa abantu amanengi bathi lokhu akusoze kubancede ngoba bayahlupheka okumangalisayo.

Owalwela impi yenkululeko, uMnu. Albert Tshabalala, ngomunye walabo abathi baphila nzima elizweni.

UMnu. Michal Ndiweni, osebenza labathenga bathengisa impahla, ugcizelela esithi okubhekane loTshabalala kubhekwe ngabantu abanengi abathengisa impahla ezitaladini eZimbabwe.

Uthi abantu abanengi sebephila ngokuboleka imali.

UNdiweni uphinde wathi ilizwe leZimbabwe kumele likhuthaze amankampani ukuthi enze impahla enengi yokuthengisa ukuze kutholakale imali engasetshenzizwa nguzulu.

Nxa kusehlula lokhu uthi kumele ilizwe lisebenzise imali yakwele South Africa.

Ingcwethi kwezenotho, uMnu. Bekithemba Mhlanga, uthi lokhu kungeke kwanceda ukuthuthukisa umnotho welizwe ngakho kumele eleZimbabwe liqalisa kutsha kuzo zonke indawo nxa lifuna ukulungisa umnotho.

UNkosikazi Ngwenya uthi abantu kumele bazilwele ukuze baphume ebuzimeni lobu.

Umnotho welizwe leZimbabwe ukhangelelwe ukuthi uzabhidlika ngamandla ngesikhathi ilizwe lilungiselela ukhetho oluzakwenziwa ngomnyaka ozayo.

Facebook Forum

XS
SM
MD
LG