amalinks wokungena

Breaking News

Kudutshulwa Isizalwane seZimbabwe Kwele South Africa


FILE - Abantu abamelele imota yokubathwala kwele South Africa.
FILE - Abantu abamelele imota yokubathwala kwele South Africa.

Kulesizalwane seZimbabwe esidutshulwe safa kweleSouth Africa lamhlanje ekuseni ngesikhathi ikombi abehamba ngayo isuka eJohannesburg isiya eZimbabwe ibanjwe inkunzi yizigebenga duze le Kranskop Toll Plaza.

Isikhulumeli samapholisa eLimpopo uColonel Moatshe Ngoepe, ubike ukuba odutshuliweyo lo ubesekhombini ebithwele abantu abangamatshumi amabili lambili ilubhekise eZimbabwe emadabukakusa.

Bathe befika eKranskop Toll Plaza kwaba labantu abacela ukuchitha amanzi. Besenza lokho kuqhamuke izigangi ezine zihlomile, zaqala ukubathathela omakhalekhukhwini, imali lokunye abakade bekuthwele.

Odutshuliweyo ubikwa ezame ukuthathela esinye sezigebenga lesi uvolovolo lwaso wasetshaywa luhlamvu wahle wafa qede lapho izigebenga lezi zabaleka.

Amapholisa acela ololwazi ngalezizigebenga ukuthi athintane loCaptain Richard Boshomane ku 0798945501 kumbe bebike enkambeni yamapholisa eseduze.

Lesi sehlakalo sesengeze ukwesaba kuzizalwane zeZimbabwe zona ezithi zikhanya ziqonga izehlakalo zokubanjwa inkunzi kwezimota ikakhulu amabhasi athwala abantu phakathi kweJohannesburg leZimbabwe.

Isizalwane seZimbabwe uNkosazana Thubelihle Banda uthi bakhathazeke kakhulu ngalezi zehlakalo.

“Kusobala ukuthi umuntu ma kuyikuthi ufuna imali, fast money kumbe ufuna something nje, ma engangena emabhasini uyakwazi ukuthi uzayithola imali, uzakuthola ukudla kumbe uzathola ini. So kumele ukuthi abantu bafunde uku investor in security njalo bebe strict endabeni zamaphepha ukuthi ongena ebhasini ngubani.

Le yinto egcizelelwa ngesinye isizalwane seZimbabwe obuya abe ngumculi uPretty Ndlovu.

“Ngibona engathi ukubanjwa kwamabhasi abantu abasebenza emabhasini vele yibo abalesandla ekubanjweni kwabantu ngoba awungeke uthi ibhasi isuka lapha ithi isiyafika kwenye indawo may be uzwe kuthiwa abantu abagibelayo kumele bayehle besiyachitha amanzi kutholakale ukuthi khonapho lapho abachithela khona amanzi sekulezigebenga sokubanjwa abantu.”

UMnu. Promise Sibanda uthi yinye kuphela into engaqeda ubusela osebubhahile kuzizalwane zeZimbabwe.

“So into okumele iyenzeke yikuthi ekhaya eZimbabwe akuzanywe by all means ukuthi ilizwe lilungiswe. Ngenxa yokuswelakala kwamathuba emsebenzi ngoba sesibanengi kakhulu lapha ipopulation esilapha eGoli, yikho okwenza ukuthi abantu bebambe inkunzi njalo ngeke bekume as long imisebenzi ingakaveli.”

Leke yinto abanye abathi isasekhatshana ukwenzeka ikakhulu nxa kukhangelwa udlakela oluqhamuke eZimbabwe izolo ngensolo yempumela yokhetho.

XS
SM
MD
LG