amalinks wokungena

Breaking News

Bathwele Nzima Abathenga Bethengisa Impahla Emigwaqweni


Amapholisa ekhansili yeHarare adonsana lomuntu othenga ethengisa emigwaqweni.

Abathenga bethengisa impahla etshiyeneyo emigwaqweni bathwele nzima kwele Zimbabwe lapho abafumbathisa khona amapholisa isikhathi sonke besenzela ukuziphilisa. Kodwa lokhu akubavikeli ukuthi bathengise santando emigwaqweni.

Imigwaqo emadolobheni amanengi agcwele ingcekeza emangalisayo. Kuyaphithizela emigwaqweni koBulawayo, eHarare, Gweru, Kadoma, Masvingo, Beitbridge lamanye amadolobho.

Ingcekeza le iveza ukuhlupheka okumangalisayo kwabantu abathenga bethengisa impahla emigwaqweni abagijinyiswa ngamapholisa nsukuzonke azama ukubasusa emigwaqweni ibafake endaweni ezikhethwe ngamakhansili.

Inengi labathengisa impahla bathi indawo lezi kazilunganga ngoba akulabantu abahamba hamba duzane lazo ngakho-ke bacina bengena enzikini zamadolobho lapho abaphandela khona imuli zabo.

Omunye wabathengisa emigwaqweni nguNkosikazi Sizalobuhle Mabhena othi bahlangana lobunzima obumangalisayo ngenxa yemithetho ekubeka sobala ukuthi kumele bathele imithelo ebavumela ukuthi bathengise impahla.

“Imithetho yenza kube nzima. Iyasivalela ukuthi sithengise kwezinye indawo njalo lamalicence aba ayadura. Amalicence ahlupha kakhulu intandane labafelokazi.”

Indawo ezinengi okuthengisela khona abantu akula zambuzi kuthi nxa zikhona ziyabe zingcolile. UNkosikazi Martha Moyo uthi ukusweleka kwezambuzi kwehlisa omama isithuzi njalo kubangela ukuthi imikhuhlane imemetheke lokuhlukunyezwa kwabo.

“Ukuswelekala kwamatoilet kwenza ukuthi omama bahlukuluzwe njalo imikhuhlane imemetheke. Omama abanye bathengisa belabantwana basengozini yokuthi abantwana bahlaselwe yimikhuhlane ngenxa yokuthi badlalela engcekezeni.”

UNkosikazi Patience Dube uthi amapholisa ayabathathela impahla ngenxa yokuthi abala malicense njalo baphila ngokubafumbathisa okwaziwa kakhulu edolobheni lakoBulawayo ngokuthi yikudiza.

“Ukuphila besiphila sithengisa kodwa khathesi sekunzima amapholisa ayasithathela izinto akusaphileki. Bathi kumele sibemalicense ngakho siphila ngokudiza, lanxa ungadiza bayabuya basithathele.”

UMnu. Milton Dewa, laye othengisa emigwaqweni ngenxa yokuswelakala kwemisebenzi eZimbabwe, uthi ikhansili iyabathathela impahla okwenza behluleke ukuthi babhadale imali yemfundo yabantwana ezikolo, bebhadalele izindlu kanye laleyo imali efunwa yikhansili.

“Nxa sithengisa ikhansili iyasithathela impahla okwenza sehluleke ukubhadala amarent, izikolo zabantwana kanye lamalisence abawafunayo.”

Impahla zabo zingathathwa abathengisayo abazitholi lanxa bengazilandela kukhansili. Ngalokho, uDube uthi nxa esethathelwe impahla uyaqala kutsha ukuyaboleka imali ukuze enelise ukuqhubeka ethengisa.

“Nxa sebengithathele ngicina ngisiyaboleka imali ukuthi ngiqale kutsha ukuthengisa. Ngicina ngiboleka imali ezalayo.”

UMnu. Mike Ndiweni, okunhlanganiso emela abaphila ngokuthengisa eye Bulawayo Vendors and Traders Trust, uthi imithetho yedolobho lako Bulawayo eyokuthengisa emigwaqweni seyatshiywa yisikhathi.

“Umthetho kakhansili esithi yiUrban Councils Model hawkers and street vendors usutshiywe yisikhathi, wafakwa ngamakhiwa ngo1976 uvimbela abantu abamnyama ukuthi bangene edolobheni. Khathesi awusahambelani lesisekelo sombuso.”

Sehlulekile ukukhuluma leziphathamandla zekhansili ngodaba lolu. Amafekithali amanengi koBulawayo avaliwe ngenxa yokugugudeka komnotho welizwe. Lokhu kukhanya kubangelwa nguhulumende okuthiwa kadlelani kahle lamanye amazwe njalo sowehluleka ukuqhuba ukhetho ngemfanelo.

Uhulumende wetheswa umlandu wokuthi ukhahlameza lelungelo likazulu. Kodwa-ke uhulumende uthi konke lokhu kubangelwa yizijeziso zenotho ezafakelwa inkhokheli yebandla leZanu PF ngamazwe entshonalanga.

Udaba Esilethulelwe NguBathabile Masuku
please wait

No media source currently available

0:00 0:06:42 0:00

Facebook Forum

XS
SM
MD
LG