Abaphila legciwane leHIV basola indlela uhulumende ahlukuluze ngayo uMporofitha uWalter Magaya ovezele ibandla lakhe eleProphetic Healling and Deliverance ngeSonto ukuthi usethole umuthi wokwelapha igciwane leHIV lomkhuhlane wengculaza.
Bethule lokhu ngoLwesine ngesikhathi uMagaya esemhlanganweni lomphathintambo wezempilakahle, uDokotela Obidiah Moyo, lapho okubikwa ukuthi uMagaya uxolisile ngakwethulele uzulu.
UMagaya uvumile emhlanganweni awenze labezempilakahle ukuthi uphambanisile ukuthi wethulele uzulu umuthi lo engalandelanga imithetho yelizwe.
Kuthi-ke uDokotela Moyo laye egcizelele esithi bazasebenza loMagaya ekuhlolisiseni umuthi umuthi wakhe.
Kasenelisanga ukukhuluma loDokotela Moyo loMagaya ngodaba lolu. Abaphila legciwane leHIV bathi bekumele uhulumende akhulumisane loMagaya ngomuthi awubiza ngokuthi yiAguma kulalokhu okwenziwe ngamapholisa angene ngenkani emawofisini akhe athatha impahla etshiyeneyo.
Kuthe kusanda kwenzakala lokhu, uMagaya watshela abalandeli bakhe ukuthi konanga lutho ngakho-ke akudingayo yikuthi uhulumende ahlolisise umuthi lo.
Abezempilakahle abagoqela uhulumende weZimbabwe, abalwela ilungelo lezigulane bezimele bodwa abeZimbabwe Doctors for Human Rights kanye lenhlanganiso yamazwe omhlaba wonke jikelele eyeWorld Health Organzation bachothoze uMagaya basebekhuthaza abantu ukuthi bengekeli ukunatha amaphilisi athundubeza igciwane leHIV.
