Abalwa impi yenkululeko bathi bakhathazwa ngokwenzakala eZimbabwe ngesikhathi belungiselela ukunanza usuku lwamaqhawe kusasa olweHeroes Day.
Abalwa impi yenkululeko bekubutho leZimbabwe People’s Revolutionary Army (ZPRA), bathi lokhu bebandlululwa nguhulumende kaMongameli Emmerson Mnangagwa njengalokhu okwakusenziwa ngowayengumongameli umuyi uRobert Mugabe.
UMnu. Isaac Mabuka, umgcinisihlalo webandla leZapu, uthi okuhluphayo yindlela okunikwa ngayo isicoco seqhawe lesizwe.
UMabuka uthi uMnangagwa, okhangelelwe ukuba uzanika abantu abalitshumi lasithupha - 16 izicoco ezitshiyeneyo kusasa ezinanza abakwenzela ilizwe, kuveza sobala ukuba kubandlululwa abanye abalwa impi yenkululeko.
UMnangagwa ukhangelelwe ukuba uzanika umkakhe, uNkosikazi Auxillia Mnangagwa, isicoco sokusebenzela ilizwe ngendlela ephezulu kanye labanye athi benza okubukekayo.
UMnu. Elifasi Mashaba, okubandla leZanu PF, uncoma okwenziwa nguMnangagwa njalo uthi kuqakathekile ukunanza usuku lweHeroes Day.
Abantu abangamakhulu amabili – 200 bakhengelelwe ukuba bazakuya emathuneni eNational Hereos Acre kusasa njalo ezabelweni kuzakwenziwa imicimbi efanayo eyokunika izicoco abantu abatshiyeneyo.
