Abantu koBulawayo bahlaba umkhosi ngokuvalelwa kwamanzi yikhansili kulandela ukucitsha kwamagetsi esithitshini sempompi ezidonsa amanzi.
Abantu bathi udubo lwamandla kagetsi oluphazamise ukusebenza kwempompi, kwakumele lulungisiswe ngesikhathi idolobho lingelamanzi hatshi khathesi.
Izakhamizi zamanye amalokitshi akoBulawayo zithi sezilamaviki amathathu zingela manzi. Zithi kazikakhulumisani ngodaba lolu leziphathamandla zedolobho leli.
UNkosikazi Getrude Tshuma, ohlala eTshabalala, uthi loludubo kwakumele lulungisiswe kulesikhathi.
“Esikubona kusenzakala edolobheni lethu sekungani yingabomo ngoba iKhansili ibilaso isikhathi sokuthi ilungisise konke okubekufanele kulungiswe ngomnyaka ophelileyo izulu lingakaqali ukuna, khathesi sekusiphambanisa ukuthi kwenzakalani ngoba kuyibo abasitshela ukuthi amadamu aselamanzi kambe kuthiweni sikhumbule ukuthi ezinye indawo umnyaka ophelileyo bekuphilwa nzima kungela manzi abalugisise yonke into kulesikhathi kungakaze konakale okunye.”
UMnu. Mkhokheli Ndlovu, ohlala eNkulumane, uthi ikhansili ihlala ilendlela yokuvika imibuzo yabantu.
“Indaba yeKhansili leyi ibuhlungu kakhulu ngoba nxa abantu bezahlala bengela manzi, bahlala belama excuses angapheliyo khathesi sebeqala ukukhuluma ngamapipe asegugile ikanti ke isikhathi sonke lesi bebehlezi bengalungisi. Into abangayifuniyo yikuthi benike abantu amanzi akwanileyo ngesikhathi sekuhlala kuyi shedding okungasiphathiyo njengama residents.”
UNkosikazi Sukoluhle Ndlovu laye uthi okwenzakalayo kutshengisa ukwehluleka kwekhansili.
“Mina ngilesimanga esikhulu ngoba idolobho lethu alisoze liphumelele liyasalela emuva ngoba ngesikhathi sokuthi kulungisiswe izinto zingakonakali akula lutho olwenzakalayo kuze kuthi sekusekonakele kukhona kulungiswa sekone izinto ezinengi kakhulu. Iphutha leli yilo okumele lilungisiswe yikhansili.”
Embikweni owethulwe yikhansili, unobhala wekhansili, uMnu. Christopher Dube, wazise ukuba ikhansili izaqhubeka ivala amanzi okwensuku ezintathu ngeviki ngenxa yohlupho lokutsha komtshina weTransformer yamagetsi esithitshini esimpompa amanzi.
Lokhu kubangele ukufa komtshina opompa amanzi eTuli Reservoir, yona exhumane leHillside kanye leRiffle Range Reservoirs.
Isikhulumi sekhansili, uNkosikazi Nesisa Mpofu, uthi, "Sibele power supply interruption ephambanise iwater works lapha esipheka khona amanzi. Amagetsi aphambanise indlela esipheka ngayo amanzi njalo ukupompa amanzi ebuya edolobheni, okwesibili idolobho laba lamagetsi acitshwayo lokhu kwenza ukuthi itransformer lemotor eyempompi ezisebenza sihambisa amanzi. Ukucitsha kwamagetsi yikho okwenze ukuthi singenelisi ukuhambisa amanzi."
Ngomnyaka odluleyo idolobho lakoBulawayo beliphakathi kobunzima obukhulu bokuswela amanzi ngemva kokuba limise ukuthatha amanzi emadamu amathathu -eleUpper, iLower Ncema leUmzingwane.
Lokhu kwenza ukuthi amalokitshi amanengi aqede insuku eziyisithupha kusiya kumaviki amabili engela manzi njalo kwaqhamuka imikhuhlane yesisu eyabulala abantu eLuveve.
Ikhansili isiqalile ukudonsa amanzi emadamu lawa njalo amadamu ekhansili aselamanzi ayisilinganiso samatshumi ayisikhombisa ekhulwini - 70% kulandela ukuna kwezulu.
Uhulumende sewakhipha imali yokwakha idamu leGwayi-Shangani okuyilo okukhangelelwe ukuqeda uhlupho lokusilela kwamanzi koBulawayo.
Ngenyanga edluleyo umongameli Emmerson Mnangagwa uvule okusemthethweni izibhorane ezise Eppington Forest kanye lomcimbi wokuthakazelela ukuxhunywa kwephayiphi ezathwala amanzi isuka edamu leGwayi Shangani iwasa koBulawayo nxa seliphelile ukwakhiwa.