amalinks wokungena

Breaking News

Isidumbu Sika Kenneth Kaunda Sizahanjiswa Ezabelweni Zonke eZambia Engakangcwatshwa


Former Zambian president Kenneth Kaunda

Kukhangelelwe ukuba isidumbu sikamuyi uKenneth Kaunda, owayengumongameli wakwele Zambia obhubhe ngeviki ephelileyo, sizahanjiswa kuzulu ezabelweni zonke engakangcwatshwa mhlaka 7 Ntulikazi.

Iphephandaba leTimes of Zambia libika ukuba uNkosikazi Inonge Wina, umsekeli kamongameli wakwele Zambia, utshele intathelizindaba eLusaka ngoMvulo ukuba abantu kabasoze bavunyelwe ukugqoka izembatho zamabandla abo ngesikhathi kukhalelwa umdeni kaKaunda.

Iphephandaba leli lithe uNkosikazi Wina ubike ukuba kuzakwenziwa imithandazo ezabelweni zonke ngesikhathi isidumbu sisemphakathini.

Libika njalo ukuba akusoze sibonwe ngabantu isidumbu sika Kaunda ezabelweni zonke.

Kukhangelelwe ukuba isidumbu sakhe sizathwalelwa eLusaka mhlaka 5 Ntulikazi engakangcwatshwa ngumdeni wakhe labanye abantu abazakhethwa yimuli yakhe.

Ibandla lokholo lweSiKhristu eleUnited Church of Zambia lizakhokhela imikhuleko ezabelweni zonke.

Abantu kwele Zambia bazakhalela umdeni kaKaunda insuku ezingamathumi amabili lanye – 21.

Banengi abantu, abagoqela ababekubutho leZimbabwe People’s Revolutionary Army (ZPRA), abancoma imisebenzi kaKaunda.

UKaunda wabusa eleZambia kusukela ngomnyaka ka1961 kusiyafika umnyaka ka1991. Wasebenza kakhulu lomuyi uJoshua Mqabuko Nkomo, owayekhokhela ibandla leZapu.

Abalwa impi yenkululeko belolongwa libutho leZPRA kwele Zambia bayincoma kakhulu imisebenzi kamuyi Kaunda. Banengi abalolongwa ekusebenziseni izikhali bekwele Zambia ngesikhathi sempi yenkululeko. Inengi labo babesekela ibandla leZapu.

Kulabanye njalo abacina besuka kubutho leZPRA sebelolongiwe bayangena kwele Zimbabwe African National Liberation Army (ZANLA), elaliphansi kwebandla leZanu.

UMnu. Roma Nyathi, omunye wabantu abalolongwa kusungulwa ibutho leZIPRA, uthi uKaunda waphendla indlela yokusebenzisa izikhali ebambisana loAbraham Nkiwane, uSikhwili Moyo, uThomas Ngwenya uDumiso Dabengwa labanye.

Omunye njalo owalwa impi yenkululeko, uMnu. Mark Mubaiwa, uthi uKaunda wasebenza kakhulu loba abamhlophe babebhomba indawo ezinengi elizweni lakhe.

Lokhu kusekelwa nguMnu. Mkhululi Zulu, laye owalwa impi yenkululeko.

UMnu. Isaac Mabuka, okhokhela ibandla leZapu njalo owayekubutho leZIPRA, uthi kunengi okwenziwa nguKaunda, okwanceda ilizwe leZimbabwe.

UMnu. Believe Gaule 0webandla leZanu PF, uyakusekela lokhu. Kukhangelelwe ukuba uMongameli Emmerson Mnangagwa uzakuya emngcwabeni kaKaunda.

Kuvaleliswa Umuyi uKenneth Kaunda
please wait

No media source currently available

0:00 0:04:03 0:00


Facebook Forum

XS
SM
MD
LG