amalinks wokungena

Breaking News

Abahlome Ngemibhobho Bathumba Umlandeli weZanu PF


Inxabanxoza ekubandla leli isithwalise nzima abanye abakubandla le Zanu PF.
Inxabanxoza ekubandla leli isithwalise nzima abanye abakubandla le Zanu PF.

Kuqhubekela phambili ukulwisana kubandla le Zanu PF kulandela ukuthunjwa kosakhulayo lamuhla, uMnu. Jim Kunaka, ocatshangelwa ukuthi usekela umsekeli kamongameli welizwe, uNkosikazi Joice Mujuru.

Obone isenzakalo lesi, uMnu. Wellington Peyama, osekela ibandla leZanu PF uthi uKunaka uthunjwe ngabantu akade behamba ngemota wenelisa ukweqa emoteni le wadla phansi loba kade eselimele okumangalisayo.

UPeyama utshele iStudio 7 ukuthi abacatshangelwe ukuthi bathumbe uKunaka yilabo abasekela ibandla leli bekucele likaMnu. Emmerson Mnangagwa umphathintambo wezemithetho ocatshangelwe ukuthi ulwisana loNkosikazi Mujuru ekuthatheni isikhundla sikamongemeli nxa uMongameli Robert Mugabe oseluphele engasitshiya lesisikhundla.

UKunaka owazakala ngokukhokhela inhlanganiso ecatshangelwa ukuthi ngeyezigebengu elokitshini leMbare eHarare, ubikwa esesibhedlela seAvenues Clinic lapha ayelatshwa khona.

UPeyama uthi kucatshangelwa ukuthi omunye wabo osekela uMnangagwa, uMnu. Godfrey Gomwe, ulwisana loKunaka njengoba ecatshangelwa ukuthi usekela uNkosikazi Mujuru.

Kasenelisanga ukukhuluma loGomwe ngodaba lolu njengoba kade engaphenduli umakhalekhukwini wakhe. Isikhulumeli samapholisa, uSenior Assistant Commissioner Charity Charamba, walili ukukhuluma ngodaba lolu esithi ukukhefu.

Kusenjalo, owayekubandla leZapu osekudale lePolitburo kubandla le Zanu PF, uMnu. Cephas Msipa, uthi ukulwisana lokhu kubandla leli kungalibhidliza.

Ukuze sihlaziye okwenzakalayo kubandla leli, akesizwe ingcwethi kwezombusazwe uMnu. Nkululeko Sibanda osekolitshini leHuddersfield University eBhilithane exoxa loGibbs Dube weStudio 7.

XS
SM
MD
LG