amalinks wokungena

Breaking News

UMugabe Uzakhetha Abasekeli Bakhe Na Kumbe Bazavotelwa?


UMongameli Robert Mugabe

Idale lePolitburo lebandla leZanu PF likhangelelwe ukuguqula isisekelo sombuso walo ngempelaviki ukwenzela ukunika uMongameli Robert Mugabe amandla wokukhetha abasekeli ababili lomgcinisihlalo.

Abalandeli bebandla leli lababukele okwenzakala kuZanu PF bathi sokusobala ukuthi idale leli lizathatha lesisinqumo ukwenzela ukuvalela umsekeli kamongameli uNkosikazi Joice Mujuru ukuthi abiselwe esikhundleni sakhe emhlanganweni weCongress ozakwenziwa ngoMpalakazi.

Bathi konke lokhu kwenziwa licele elicatshangelwa ukuthi lisekela uMnu. Emmerson Mnangagwa okhanya eselwisa ngamandla ukuthathela uMujuru isikhundla lesi.

Kodwa-ke omunye wabalandela udaba lolu uMnu. Ibbo Mandaza ingcwethi kwezombusazwe owehlanganiso yeSouthern African Political and Economic Series uthi uMugabe ulakho njalo ukuthi loba engaphiwa amandla okukhetha abasekeli bakhe, engakwenzi lokhu njengoba elokhe efuna ukuhlala esikhundleni sakhe engahlutshwa ngabasekeli.

UMandaza uthi akusozwe kumangalise ukuthi uMujuru kasoze akhethwe njengoba elwisana okumangalisayo loMngangagwa labanye bakhe abathi kenelisi ukwenza umsebenzi wakhe, uzama ukugenqula umongameli njalo ulesandla esibi kwezemali.

Bakhona njalo abathi uMugabe ulakho ukukhetha abasekeli bakhe ebantwini abagoqela uMnangagwa, uNkosikazi Eunice Sandi, uNkosazana Oppah Muchinguri, loNkosikazi Ednah Madzongwe.

Uthi kukhanya engani uzakhetha uMnu. Phelekezela Mphoko kumbe uMnu. Simon Khaya Moyo ukuthi babambe isikhundla somgcinisihlalo webandla leli. Kusenjalo, uMujuru ubikwa esefake amaphepha okuthi akhethwe ukuba ngumsekeli kamongameli.

Ukuze sihlaziye udaba lolu, sixoxe loMnu. Morris Ngwenya ingcwethi kwezombusazwe njalo okubandla leZanu PF ngokukhethwa kwalabo okuzamele bangene kudale lePolitburo.

Ekuqhubekeni kokudonselana amandla kweziphathamandla ze Zanu PF inengi selithandabuza ukuthi uNkosikazi Grace Mugabe nguye na isiqokoqela sengxabangxoza ekubandla leZanu PF? Lumbuzo uza kulandela imihlangano lenhlangothi ezitshiyeneyo zelizwe eyenziwe nguNkosikazi Mugabe epulazini lakhe le Mazowe lapho aphindaphinde ukuthi umsekeli kaMongameli, uNkosikazi Joice Mujuru kumele asuke esihlalweni.

Lokhu sekutshiye abagcinisihlalo bezigaba zebandla phose zonke bengasela msebenzi. Ngabe uNkosikazi Mugabe engangenanga kwezombusazwe ngabe lobu budlwangudlwanu bukhona na?

Ukuhlaziya loludaba uChris Gande weStudio Seven uxoxe lesiphathamandla sebandla leZanu PF, uMnu. Morris Ngwenya endawonye ukuze sizwe imbono yabo lengcwethi kwezokwethulwa kwemibiko, uMnu. Zenzele Ndebele onguye osungula lingxoxo.

Ingxoxo loMnu. Morris Ngwenya loMnu. Zenzele Ndebele
please wait

No media source currently available

0:00 0:07:15 0:00
Lapho esitholakala khona

XS
SM
MD
LG