amalinks wokungena

Breaking News

Amalunga Ebandla leZanu PF Asefuna Ukujezisa uEnergy Mutodi Osanda Kuxotshwa Kuhulumende


UMnu. Energy Mutodi
UMnu. Energy Mutodi

Ibandla leZanu PF likhangelelwe ukuthi lizajezisa uMnu. Energy Mutodi osanda kumiswa umsebenzi nguMongameli Emmerson Mnangagwa.

Iphephandaba leSunday Mail libika ukuthi amalunga ebandla leli eGoromonzi aselobele uMutodi incwadi emazisa ukuthi uzahlaliswa phansi athoniswe amacala ambalwa.

Amalunga la athi azalandela iziqondiso zesisekelo somthetho webandla leli ekujeziseni uMutodi oxotshwe nguMnangagwa kulandela akwathule ebulenjini bokuxhumana obeTwitter lapho achothoze abesifazana abathathu abakubandla leMDC abathi bathunjwa batshaywa kabuhlungu ngabacatshangelwa ukuthi badlelana lohulumende kaMnangagwa.

Abathathu laba nguNkosazana Joanna Mamombe, uNkosazana Cecilia Chimbiri loNkosazana Netsai Marova, abathunjwa betshengisela emigwaqweni bekhonona ngokuswelakala kokudla. UMutodi wathi abantu laba bathunjwa ngabanye babo abakubandla leMDC waphinda wathi kukhanya batshaywa ngenxa yokuthi babesenza imisebenzi yabathengisa imizimba. Bayakuphika lokhu.

Kasenelinga ukukhuluma ngodaba lokujeziswa loMutodi obikwa ukuthi usanda kutshontshelwa impahla endlini yakhe eHarare. Sixhume uMnu. Believe Gaule webandla leZanu PF othi uMnangagwa wenza kahle ngokuxotsha uMutodi.

UGaule uthi kumele umuntu oqhatshwe nguhulumende ahloniphe uzulu.

UMutodi, obengusekeli kamphathintambo obona ngezokwethulwa kwemibiko, waziwa ngokucula umculo wohlobo lwe-rumba. Abanye bawubiza bethi yiNdombolo.

XS
SM
MD
LG