Kuyaxokozela okumangalisayo kwezombusazwe eZimbabwe okulomkhokheli webandla leMthwakazi Republic Party (MRP) osephila lenyamazana zasendle ngenxa yokuthi wesaba ukuthunjwa ngabacatshangelwa ukuthi badlelana lohulumende kaMongameli Emmerson Mnangagwa.
Banengi abadlela evalweni loba ibandla leZanu PF lisithi besaba umnyama ongelampisi.
UMnu. Mqondisi Moyo uthi kasoze asuke eZimbabwe loba esehlala egangeni kulandela ukudingwa kwakhe endlini koBulawayo ngabantu ababehlomile athi babefuna ukumbulala.
UMoyo uthi ilizwe leMelika kalikhulumi ngokukhahlanyezwa kwakhe lamalunga eMRP, okwaqala besanda kuvimba uMnu. Floyd Ambrose, okubandla leZanu PF, owayezama ukuhluthuna impahla kaMnu. Brian Davies eNtabazinduna.
UMnu. Innocent Ndibali, okubandla leEconomic Freedom Fighters Zimbabwe, uthi akulunganga ukuhlutshwa kwabaphikisa uhulumende.
UNdibali uthi abalamacala kumele baziveze ngoba abanye abantu abadinga abaphikisa uhulumende ebusuku yizigebengu.
Okwethulwa nguNdibali kumangalisa uMnu. Mthulisi Hanana, umqondisi wenhlanganiso yeDumiso Dabengwa Foundation, owabaleka eZimbabwe edingwa ngamapholisa ensitha.
UMnu. Joseph Tshuma, okubandla leZanu PF, uthi kumele abantu bedlelane kulokuthi balwisane sonke isikhathi.
UTshuma uthi abalandeli baka Moyo bephula umthetho koBulawayo.
Loba kulokuxokozela lokhu elizweni, uMoyo uthi abantu kumele bazimisele ukulwisana lombuso kaMnangagwa.
Akwaziwa ukuba uMoyo labanye abadlela evalweni bazakwenzani ngokuya kwesikhathi eZimbabwe. Abadala bathi sizayicela isivuthiwe.
