amalinks wokungena

Breaking News

Abadabuka eZimbabwe Abalitshumi Lane Sebexotshiwe eBhilithane


Andrew Nyamayaro (Photo/Credit: Andrew Nyamayaro Facebook page)

Abadabuka eZimbabwe abalitshumi lane – 14 abaxotshwe kwele Bhilithane bafike namuhla ekhaya kulandela isivumelwano esenziwe ngohulumende bamazwe womabili esokuthi abalamacala atshiyeneyo kumele babiselwe eZimbabwe.

UMnu. Andrew Nyamayaro, elinye lamagqwetha abamele abantu laba labanye abalokhu bekwele Bhilithane, uthi bazame ngamandla wonke ukuvimba ukuba babiselwe ekhaya kodwa kwehlula.

UNyamayaro uthi bamise indizamtshina okwesikhathi eside kusahlolisiswa udaba lwabanye abacine besuswa endizamtshineni behanjiswa entilongweni yabamelele ukubiselwa emazweni abo ngenkani.

Uthi imibiko ayithola ekhaya iveza ukuba abafike namuhla kwele Zimbabwe bahanjiswe endaweni ebizwa ngokuthi yiZIPAM lapho abazavalelwa khona okwensuku ezimbalwa bengakayi lapho abadabuka khona.

Uthe kuzwisa usizi okwenziwe nguhulumende wakwele Bhilithane lowe Zimbabwe ababumelane ukuba abantu laba babiselwe abadabuka khona.

UNyamayaro uthi kulabanye abesaba ukuba bazakhahlanyezwa nguhulumende kaMongameli Emmerson Mnangagwa. Kodwa uMnu. Frederick Shava, isiphathamandla sikahulumende obona ngokudlelana lamanye amazwe, uthi kabasoze bathwalise inzima abantu laba ababiselwe ekhaya.

Uhulumende wakwele Bhilithane ubefisa ukuxotsha abadabuka eZimbabwe abangamatshumi amahlanu – 50 izolo kodwa abanye babo baphanyeke udaba lwabo enkantolo umahluli wavuma ukuba bengabiselwa ekhaya.

EleBhilithane lithi lizabisela abantu abalikhulu lamatshumi amahlanu – 150 eZimbabwe ngenyanga baze basuke bonke abenza amacala elizweni leli.

Facebook Forum

XS
SM
MD
LG