amalinks wokungena

Breaking News

Ukukhuphuka Kwenani Labathapha Igciwane leCOVID-19 Kwethusa Abadabuka eZimbabwe Abafisa Ukuya Ekhaya Ngekhefu leKhisimusi


Banengi abafisa ukuya eZimbabwe ngekhefu leKhisimuzi

Ukukhuphuka kwenani labahlaselwa yicoronavirus kwele South Africa ngosuku kwethusa kakhulu izizalwane zeZimbabwe ezilungiselela ukuyabona izihlobo labangane ekhaya ngekhefu leKhisimusi.

Ugatsha lwezempilakahle kwele South Africa lumemezele ukuthi kulabantu abaphose bafike izinkulungwane ezingamatshumi amabili (20,000) ababanjwe ngumkhuhlane wecoronavirus emaholeni angamatshumi amabili lane edluleyo. Leli nani selethuse abanengi abavela eZimbabwe njengoba kumaviki ambalwa abebehlaselwa yilo umkhuhlane ngosuku bebephansi kwenkulungwane ezinhlanu (5,000).

Lokhu sekutshiye inengi lezizalwane zeZimbabwe zikhathazekile njengoba zilungiselela ukuya ekhaya ngekhefu lekhisimusi. Lokhu kwenzakala futhi ngesikhathi lapho kulindelwe, uMongameli Cyril Ramaphosa, ukuthi enze isimemezelo ngemiqoqo ezabakhona kulandela ukukhwela kwenani labahlaselwayo ngosuku.

Isizalwane seZimbabwe, uNkosazana Ethel Ndlovu, uthi sebedlela evalweni njengoba sekuyisikhathi sokuthi balubhekise ekhaya.

“Lokhu kodwanje kuyasikhathaza kakhulu because isikhathi sokuya emakhaya yisolesi. Kumanje asikwazi ukuthi sizakwenzani. Abanye sesike sabona izihlobo zethu zingcwatshwa singekho besekuthiwa asiyi. Ngabe kuyavuma besidedele ngoba le indaba inzima.”

Abanyeke abanjengo Naison Moyo besabela ukuthi abaya ekhaya bazalithwala leli gciwane bayeligcwalisa ekhaya ngesikhathi ezempilakahle zivele zintengantenga eZimbabwe.

“Imajority yabantu abasuka la for amaholiday besiya eZimbabwe avabavaccinatwanga and ama vaccination yeZimbabwe i slow. So, kutsho ukuthi uDecember lo is a death sentence for a country enjengeZimbabwe. Yikho ukuqala kwenkathazo iyangenake icorona virus and izongena stronga ngenxa yabantu abasuka la bethi bayabona abadala kanti babaphathela icorona.”

UMnu. Vusa Ncube yena uthi okubuhlungu yikuthi uhulumende weZimbabwe ubevele eseyiqinisile imigoqo yokungena elizweni.

“As it is vele sikhuluma kanje eZimbabwe kunalowu umthetho wokuthi obuyayo kufanele aye kuquarantine for 14 days from esikhwameni sakhe. Khonalokho kodwa sekusenza ukuthi loba amanumber ayakhuphuka kumbe ayenzani sebekufakile vele ukuthi 14 days. Whether uteste negative 14 days quarantine.”

Ingcitshiki zithi zinengi izibonelo ezikhombisa ukuthi igciwane le Omicron elimemetheka ngamandla kweleSouth Africa alilabo ubungozi obufika kula asethe abonakala. Bangaphansi kwamatshumi amane (36) abantu ababulewe yicoronavirus phakathi kwabaphose bafike izinkulungwane ezingamatshumi amabili abahlaselweyo.

Zibika njalo ingcitshi ukuthi inani labavalelwa ezibhedlela lilokhu liphansi kakhulu nxa kuqathaniswa lendlela ebeliqonga ngayo kuhlandla lakuqala, elesibili lelesithathu sokuhlasela kwecoronacirus.

Uhulumende usebuye wapha imvumo yokuhlatshwa kwabantu ijekiseni yesithathu okuyinto ingcitshi ezithi izakupha ukuvikela okukhulu ikakhulu ngalesisikhathi eleSouth Africa selingene kuhlandla lesine lokuhlasela ngamandla kwalo umkhuhlane.

Sebesedlula izigidi ezintathu asebehlaselwe yicorona virus kwele South Africa selokhu yaqalayo. Asebefile bona sebesedlula izinkulungwane ezingamatshumi ayisitshiyagalolunye (90,000).

Abahlatshwe ijekiseni yokuzivikela kucoronavirus sebephezu kwezigidi ezingamatshumi amabili lesithupha (26,000,000).

Facebook Forum

XS
SM
MD
LG