amalinks wokungena

Breaking News

Zimrights: Inkulumo kaChinamasa Ngeyenzondano


Umnumzana Patrick Chinamasa

Sokube lokuqansa kwezehlakalo zokuhlukunyezwa lokuthunjwa kawamalunga amabandla aphikisayo kanye labenhlanganiso ezilwela amalungelo kazulu abalemibono ephambana lekahulumende eZimbabwe.

Lokhu kwenzakala ngaphambili kohlelo lokutshengisela ngoLwesihlanu, mhlaka 31 Ntulikazi, okujonge ukuba abantu baveze ukukhonona kwabo ngesimo somnotho esiselizweni esibangelwa yinkohlakalo esibhahile kuziphathamandla zikahulumende.

NgoLwesithathu ekuseni, UNkosikazi Ottilia Sibanda olilunga lebandla eliphikisayo ele MDC Alliance, ubikwa ethunjiwe emzini wakhe njalo akaziwa ukuthi ungaphi laze layatshona ilanga.

Ukhansila Mlandu Ncube wakoBulawayo uthi okuthunjwa kwabantu ezindlini zabo kuveza ukuba uhulumende obusayo wesaba abantu bakhe.

“Kubuhlungu lokhu okwenzakalayo ukuthi abantu bayatshontshwa ezindlini zabo, lokhu esikuzwayo njalo kuyadanisa kakhulu. Yisitshengiselo sokuthi uhulumende lowu sesesaba izakhamuzi zeZimbabwe ngoba nxa ungesabi ukuthi ulesazela esikwenza ukuthi abantu bethi ungahlali embusweni, inkinga uyabe usubatshontshelani. Kayelele abantu bakhulume intando yabo.”

Imizamo yokuxhumana lamapholisa ngokutunjwa kukaNkosikazi Sibanda yehlule ngoba abengadobhi ucingo lwawo. Lemibuzo ethunyelwe kusikhulumeli samapholisa uMnu. Paul Nyathi enkhundleni yeWhatsapp ibi lokhu ingakaphendulwa saze saya emoyeni.

Umnumzana Greater Sibanda umsekeli kamqondisi we Mthwakazi Human Rights Restoration Movement uthi kuadanisa kakhulu okwenzakalayo elizweni kwezombusazwe.

“Ukugqekezwa kanye lokungena ngamandla ezindlini kubangelwa ngezo mbusazwe, ezokufuna ukubusa. Laba abakwenzayo bazithola beqaliwe nxa laba abaphandle befisa ukuthi bangene bebembula izigqoko. Lokhu okwenzakalayo kuyikwetshulwa kwamalungelo abantu yikho ke makusetshulwa amalungelo abantu angiboni ukuthi labo abasezikhundleni angiboni ukuthi bangakuthanda ukuthi bagcotshwe amabizo abo. Yikho kumele bayefika ebusuku ukuze kungazakali labo baphike kuhle kusasa.”

Umnumzana Lungani Ndebele oyisakhamuzi sakoBulawayo uthi uhlupho olukhona eZimbabwe yikuba ungehlukana umbono lohulumende uhle ube yisitha.

“Into enjengaleyi ukuhlaselana uhlupho yikuthi eZimbabwe sesaba lenkinga yokuba si solver ama problems through emotions. Okutsho ukuba umuntu engiphikisana laye uhle abe yisitha, yikho ke lokhu okubangela zonke lezi izinto. Ungehlukana lami ngombono, nge culture esesiyifakile eZimbabwe uyabe usunguqalile sokumele sithwalelane induku.”

Kunsuku ezidluleyo isikhulumeli sebandla leZanu PF umnumzana Patrick Chinamasa wathi ibandla leMDC abalandeli bebandla leZANU-PF kumele bahlasele yiloba ngubani ozasekela ukutshengisela okuqoqwe ukwenziwa mhlaka 31 Ntulikazi. Ngemva kwalokho sekuvele ama Vidiyo abalandeli bebandla leZANU-PF bethembisa ukuthi bazatshaya abantu abazabebetshengisela.

Inhlanganiso elwela amalungelo kazulu eyeZimrights yethule umbiko wokusola inkulumo kaMnu. Patrick Chinamasa isikhulumeli seZanu PF othe abasakhulayo bebandla lakhe kabasoze bagoqe izandla abantu besephula umthetho ngokutshengisela ngoLwesihlanu, mhlaka31 Ntulikazi. Abenhlanganiso le, bathi lokhu kwephula amalungelo kazulu akusahluko sesithathu sesisekelo sombuso welizwe.

IZimrights ithi njalo inkulumo ekhuthaza inzondano ayivunyelwa yisisekelo sombuso. Bathi kulobufakazi obunengi obuveza ukuthi lapho okulenkulumo yenzondano evela kubakhokheli kuvame ukuba lobudlwangudlwangu lokuchitheka kwegazi okungamelanga kwenzakale.

IZImrights isikhweze isicelo kumakomishini amele alawule ukulondolozwa kwelungelo loluntu athi eyeZimbabwe Human Rights Commission (ZHRC), leyeNational Peace and Reconciliation Commission ( NPRC ), ukuthi angenele akhangelisise inkulumo kaChinamasa le.

Facebook Forum

XS
SM
MD
LG