amalinks wokungena

Breaking News

Zindala Zombili ngeSonto Phakathi kweHighlanders leBulawayo City


Iqembu lenguqu ele Bulawayo City

Umqeqetshi weqembu le Bulawayo City uBekithemba Ndlovu uthi abafana bakhe bawulinde ngamehlo abomvu umdlalo wangeSonto abazawudlala leqembu le Highlanders enkundleni eye Barbourfields ko Bulawayo.
UNdlovu uthi amalungiselelo eqembu lakhe ahambe kuhle kakhulu njalo abadlali bakhe bonke batshengise ukuba lamadlabuzane kakhulu ngesikhathi bezilolonga.
Uthi khona ukuba iqembu le Highlanders ngelinye lamaqembu amakhulu elizweni yikho okwenza bonke abadlali babe lomdlandla wokudlala ngeSonto.
Iqembu le Bulawayo City lihlezi endaweni yesibili nxa usuka ngaphansi kwengalane lilemiklomelo elitshumi lathoba munwe munye.
Kusele imidlalo emihlanu ukuba imidlalo yalonyaka eyesigaba se Castle Lager Premier Soccer League ifike emaphethelweni njalo iqembu le Bulawayo City kumele linqobe kuyo yonke ukuze liyale lilokhu lilethemba elokwala lidlala kusigaba se PSL.
UNdlovu uthi yena ikhefu elibekhona kudedelwa imidlalo yeqembu lesizwe lilakho ukuba liphazamise abafana bakhe bona abanqobe iqembu elilwisa ukuphakamisa isicoco ele Ngezi Platinum Stars emdlalweni wabo olandelwa yilo owangempelaviki.
Kumidlalo eminye elisele layo kusizini yalonyaka iqembu le Bulawayo City lizadlala lele ZPC Kariba, ele Yadah, ele CAPS United kanye lele Mutare City.
Kweminye imidlalo yesigaba se Castle Premier Soccer League ezadlalwa kulimpelaviki iqembu le ZPC Kariba lizadlala lele CAPS United eNyamhunga, iqembu le Ngezi Platinum Stars lizangqikilana lele Chapungu eBaobab, iqembu le Nichrut lizadibana lele FC Platinum ngase Ascot, iqembu le Chicken Inn lizadlala lele Bulawayo Chiefs ngase Luveve.
Yonke le yimidlalo yakusasa ngoMgqibelo kuthi ngeSonto iqembu le Mutare City Rovers lizadlala lele Yadah ngase Vengere, iqembu le Dynamos lizatshayana lele Black Rhinos ngase Rufaro, iqembu le Triangle lizemukela ele Herentals ngase Gibbo kuthi ele Shabanie Mine lizadlala lele Harare City ngase Maglas.
Kolunye udaba olumayelana lomdlalo wenguqu uhlelo lokuba amaqembu asele kumncintiswano we Chibuku Super Cup azadlala njani kusigaba se semi – final luqhutshwe namhla esigodlweni iHarare njalo iqembu le Harare City lizadibana lele CAPS United kuthi ele Dynamos lizadlala lele Triangle.
Inkundla okuzadlalelwa khona limidlalo khona zizatshelwa uzulu.

please wait

No media source currently available

0:00 0:02:52 0:00

Facebook Forum

XS
SM
MD
LG