amalinks wokungena

Breaking News

Zinlutshwana Indawo Zokubhalisela Ukuvota: Kutsho AbeZimbabwe


Voter Registration

Abantu baveza ukukhathazeka ngenani eliphansi lendawo zokubhalisela ukuvota ezingamakhulu athobamunwemunye -900, ilizwe lonke, ezihlelwe ngabekomishini ebona ngezokhetho eye Zimbabwe Electoral Commission.

Inengi labantu lithi iZEC kumele ivule indawo ezinengi ukwenzela ukuba zibe seduze laduzane kuzo zonke iziqinti ezweni, bengacini bebanjwa ngamandla ukuhamba imango emide ukuthi bayebhalisela ukuvota.

Olwela amalungelo oluntu uMnu Effie Ncube ngomunye olombono munye.

“Amaregistration centres malutshwane kakhulu lawa akhulunywayo eziwadingayo zinkulungwane lenkulungwane ngoba abantu abafanele babhalise banengi kumele kubele registration centre kuyo yonke indawo emakhaya ledolobheni kungabi lomuntu ohamba umango omude esiyadinga ukubhalisela ukuvota kumele kubelula ukuba babhalise ngoba uma ukhetho kungelabantu abavotayo ayisilokhetho ukhetho lukhetho ngabantu abavotayo. Ukusondeza eduze ukubhalisela kuzenza kubelula kumuntu wonke kuhlanganisa lokuvota.”

Isakhamuzi sakoBulawayo uNkosikazi Cora Ndebele uyaluncoma uhlelo lokubhalisela ukuvota.

“Uhlelo lokubhalisela ukuva luhlelo oluhle ikakhulu kubomama labasakhulayo ngoba bazakwenelisa ukuyabhalisela ukuvota hatshi ukuhamba imango emide.”

UNkosikazi Ndebele uqhubekele phambili ethi labathathisa izithupha labo sekumele bavule indawo ezinengi.

“Uhlelo lokubhalisela ukuvota kumele luhambisane lolokuthathisa izithupha ngoba inengi labantu alilazithupha bebesehluleka ukuthatha izithupja ngesikhathi seCovid-19 lockdown ngoba kungekela ukubanjalo kuzadala ukuba izigaba zehle ngoba bebalutshwane ababhalisele ukuvota loba sekulendawo ezivuliweyo zokubhalisela ukuvota njalo lamabandla ezombuso kakhutshuzele amalunga abo ukuba bayebhalisela ukuvota kukhetho oluzayo.”

UNkosikazi Abigail Mupambi umqondisi weThis Constitution ukhuthaza abasakhulayo ukuyabhalisela ukuvota loba kungabe kungumango.

“Siyakubongela lokhu okwenziwe yiZEC kodwa sicela ukuba bangezelele amacentres okubhalisela. Isifiso sami yikuthi abasakhulayo bagijime bayebhalisela ukuvota ukuze benelise ukuvota isikhathi sisesekhona ukuze kungabi lothi ngehluleka ukuvota ngoba indawo zokuvotela zazikude. Labasemadolobheni abaphatheke bayebhalisela ukuvota bangaqini emlonyeni.”

Isakhamuzi sakoBulawayo uSibakhulule Sibanda ngomunye wabakhala ngokuthi indawo zankona zikude.

“Uhlelo lokubhalisela ukuvota siyayijabulile ngoba uyenze kusaselesikhathi uhlupho yikuba kungumango, akude lakude kulabantu, njengoba sekukhona sikhuthaza abantu ukuba bayebhalisela ukuvota ukuze bazi ukuvota ngo2023. Abatsha abasukume bayebhalisela ukuvota njengentsha yeZambia ukuze sintshintshe ubunzim esibhekane labo ngoba kuyiyo indlea esemthethweni.”

Ikhomishini ebona ngezokhetho ezweni, eyeZimbabwe Electoral Commission yenze isimemezelo sokuvula indawo ezingamakhulu ayithobamunwemunye ukuze abantu bayebhalisela ukuvota emalungiselelweni wokhetho lomnyaka ka2023. Ababhalisa kudala labo bahle bathole ithuba lokuhlola amagama abo ukuze babe lesiqiniseko sokuba amagama abo akhona kuluhlu lokuvota, olweVoters Roll.

Facebook Forum

XS
SM
MD
LG