Uhulumende uzahlangana lezisebenzi zakhe ngoLwesithathu bekhulumisana ngodaba lweholo izisebenzi ezithi kumele lengezwe njalo lihlawulwe ngedola leMelika.
Umhlangano lo ngowakuqala lonyaka phakathi kukahulumende lezisebenzi zakhe njalo uza ngesikhathi impilo iqhubeka inzima kuzulu ngenxa yokudula kwezinto lokudilika komnotho.
Umphathintambo obona ngendaba zezisebenzi uMnu Paul Mavhima utshele lumsakazo ngoMvulo ukuthi kukhona akuphetheyo okuthe xaxa azahamba lakho kulumhlangano lanxa nje engatshongo ukuthi kunganani.
Uvumile ukuthi ngempela izisebenzi zikahulumende zidla luklubhu lokuthi kumele zengezelelwe iholo.
Unobhala jikelele weZCTU uMnu Japhet Moyo yena uthe: "Sikhangelele ukuthi kube lokuhlangana kwembono kulumhlangano ukuze siye phambili sikhulume ngokunye okuhluphayo ku-civil service, ngoba ayisilodaba lweholo kuphela."
Amazwi kaMoyo agcizelelwe ngumgcinisihlalo wenhlanganiso yababalisi bemaphandleni iAmalgamated Rural Teachers Union of Zimbabwe (ARTUZ) enyakatho yeMandebeleni uNkosikazi Sokulohle Ndlovu.
"Sokuyisikhathi eside uhulumende engasinakekeli thina njengababalisi. Ngakho, sikhangelele ukuthi asibisele kumali ebesiyihola ngo2018, iUS$450, ngoba iRTGS nxa sikhangele, ilahlekelwa luhlonzi suku ngosuku," kutsho uMaNdlovu.
Ilunga leZanu PF uMnu Believe Gaule laye utshele iStudio 7 ukuthi ngempela uhulumende kumele athathe amanyathelo ngoba izisebenzi zakhe zithwele nzima.
Abanye bathi ukwala kukahulumende ukukhweza iholo lezisebenzi ngesilinganiso ezisifunayo kanye lokwala ukuziholisa ngedola leMelika kuveza ukuthi akalandaba lezisebenzi zakhe. Kodwa uGaule uthi akunjalo.
"Akusilo qiniso lelo. Kufana lokuthi umzali kalandaba labantwa bakhe. Izisebenzi zikahulumende ngabantwana bakahulumende... Uhulumende kumele anakekele izisebenzi zakhe," kutsho uMnu Gaule.
Lanxa uhulumemende esithi umnotho welizwe uzathuthuka ngesilinganiso esizwayo lonyaka, inengi lithi kubuvilibana phambili.
