amalinks wokungena

Breaking News

Ziyasilela Ingcwethi Ezisiza Abaphila Lobugoga eZimbabwe


Umqondisi enhlanganisweni ye Deaf Zimbabwe Trust, unkosikazi Barbra Nyangairi
Umqondisi enhlanganisweni ye Deaf Zimbabwe Trust, unkosikazi Barbra Nyangairi

Iziphathamandla zenhlanganiso ezisebenzelana labalobugoga, kakhulukazi abengezwayo endlebeni zithi zikhathazwa ngokusilela kwengcwethi ezibaphathisa ngemfundiso yabalobugoga bokukhuluma ezibhedlela zikahulumende.

Emhlanganweni wokubonisana kokungenziwa ukuphathisa abagogekileyo kakhulukazi abangaboniyo labangezwayo oyenzelwe eHarare ngoLwesine, abenhlanganiso lezi bathi ngabe uhulumende uyaguqula ukumiswa kokuqatshwa kwengcwethi lezi.

Omunye wabasebenzelana labagogekileyo laba, ekunhlanganiso ye Christian Blind Mission uMnu. Michele Angeletti, ukhuthaze abammeli bedale lephalamende ukuba bethule loludaba edale, lukhangelisiswe ngoba bemqoka abantu abagogekileyo.

"Into ekhona yikuba, sizama ngayo yonke indlela ukusiza kodwa elingakwenza njengabameli, liyenelisa ukukhalaza sikhatho sonke lapho ohlelo lokuhlelwa kokusetshenziswa kwemali kahulumende sesifikile.Ngoba lokhu kumiswa kokuqhatshwa kwabantu kwezempilakahle, okwamanje, okubangelwa yisimo sezomnotho, kuphazamisa kwezokutholiswa usizo kuzulu. Lina njengabameli bezigaba edale,lilakho ukuletha inguquko,lapho kuxoxisanwa ngezemali ezihlelelwa ingatsha zikahulumende, lalapho sokumele zemukelwe okusemthethweni".

Umgcinisihlalo wekhomidhi yezempilakahle edale lephalamende, uDr Ruth Labode uthi kuyethusa ukusilela kwengcwethi zabagogekileyo wathembisa lumhlangano ukuba uzolusukumisa edale loludaba.

Kungimangalisile, okungimangalise kakhulu, yikuthi uPerm Sec ubesanda kukhuluma, basukuma bona abantu abagogekileyo, bona abanikazi bendaba, bambababaza kakhulu. Kwaswelakala obamba indaba le, indaba le ingasabuyanga yazophuma ngenye indlela, besingasoze sibe kwazi. Mina lokhu kuyangimangalisa sibili ngoba i post le kumele ibe khona, noma one. Ayevele ekhona ama position ona lawa. Lakho khonokho siyakulandelela, lizakuzwa eParliament sekuphuma ngolweSithathu next week, ku question time, kuyabuya khonokho".

Uhulumende kalanduli kuswelakala kwengcwethi eziphathisa abalodubo lokukhuluma kuzibhedlela zakhe zonke.
Unobhala kugatsha lwezempilakahle lokulondolozwa kwabantwana,u Dr Gerald Gwinji, utshele intathelizindaba ukuba lesi simo sibangelwa yikuswelakala kwemali ngenxa yesimo somnotho welizwe esingasihle.

"Laba ngabantu abafunakala kakhulu,uqeda nje ukubafundisa umsebenzi,besewusehluleka ukubahlawula,bayahamba.Lolu kungasi daba lokuba thina kasiziqhubi inhlelo zokubafundisa umsebenzi,umlandu ngowokuthi siyehluleka ukubagcina ngemva kokuphutsha lezo zifundo. Kungakho kasilungiseni lokhookuhluphayo,kwenze sibe lazo lezingcwethi eziphathisa abanganelisi ukukhuluma.

Kodwa inhlanganiso ezisebenzelana labangezwayo endlebeni laba zithi kumqoka ukuba kudingwe indlela zokwenza zibe khona ingcwethi ngoba bemqoka emsebenzini wokuphathisa abanganelisi ukukhuluma laba inengi labo bengezwa endlebeni.

Abe Christian Blind Mission ( CBM ) baphathisa ekufundisweni ekolitshini le University of Zimbabwe kwabantu abaqhuba izifundo ze Bachelor of Science in Speech Therapy and Audiology lokuphathisa kuhlangothi lwabantwana esibhedlela se Harare Hospital.

Bathi kodwa lo kumele kube ngumsebenzi kahulumende ukwenza babe khona laba bantu ngoba beqakathekile kumpilakahle yabangezwayo.

XS
SM
MD
LG