Inhlanganiso elwela ilungelo loluntu eyeZimbabwe Peace Project (ZPP) ithi iziphathamandla zebandla le ZANU PF zihlukuluza abahlali be pulazini le Hopley eHarare, kanye labaku Ward 13 eKadoma ngokuthi belethe amaphetshana atshengisa ukuthi sebebhalisele ukuvota ukwenzela ukuthi belobe phansi inombolo ezikuwo.
Lokhu kubikwa kuzabonisa ukuthi bavotele bani ngemva kokhetho, lanxa abenhlanganiso ezizimeleyo labamabandla aphikisayo bezama ukuchasisela abantu ukuthi lokhu akulasiqiniseko.
Embikweni ewethule ngoLwesihlanu, inhlanganiso yeZPP ibaqamba ngamagama ababikwa besenza lokhu njalo ithi kuveza sobala ukuthi ukhetho oluzayo alusoze lube ngolukhululekileyo.
IStudio 7 ayenelisanga ukukhuluma leziphathamandla zebandla leZANU PF kulesisigaba, ukuze sizwe ingcazelo yazo ngaloludaba.
Kusenjalo, uMnu. Pride Mukono, isiphathamandla senhlanganiso yeRural Teachers Union of Zimbabwe, uthi lanxa ingxaki sezimbalwa kuhlelo lokubhalisela ukuvota emaphandleni, ukwethuselwa kwaloluhlobo kuqhubekela phambili.
