Abasakhulayo beZanu PF abambalwa batshengisele ezitaladeni zeHarare ngoLwesithathu ngenjongo yokuveza sobala usekelo lwabo kuMongameli Emmerson Mnangagwa ngaphambilini kokhetho.
Bathe njalo bebejonge ukukhuthaza uzulu weZimbabwe ukuthi engaze aphakela kundaba zodlakela.
Ukutshengisela kweZanu PF lokhu kube yinhlekisa enkulu kwabanengi nxa kuqathaniswa lokomanyano weMDC Alliance okwenziwe ngoLwesibili ngoba bekulabantu abayingcosana nje.
Khepha okweMDC Alliance kungenwe zinkulungwane lenkulungwane zabantu ebezisola iZimbabwe Electoral Commission (ZEC) ngokungaqhubi kuhle amalungiselelo okhetho.
Umbuthano wabasekeli bebandla leZanu PF ekutshengiseleni kwabo eHarare namuhla
Aabasakhulayo beZanu PF laba babuthane buqamama lamahofisi ebandla labo lapho abethulelwe khona amazwi ngumkhokheli wabo uMnu Pupurai Togarepi.
“Kulabo abakholwa ngokwethuselana langodlakela, uMongameli Mnangagwa uthi hatshi,” kutsho uTogarepi.
“Thina sifuna ukhetho olulokuthula. Okwenza abantu bathethise iZEC kutshengisa ukuthi bayabe sebehluleke umsebenzi wabo,” kugcizelele uTogarepi ekhuluma ngeMDC Alliance.
Wengeze wathi akalakuthandabuza ukuthi ibandla leZanu PF lizanqoba kukhetho lokudinga uMongameli, amakhansila kanye lamalunga edale lephalamende mhlaka 30 ngoNtulikazi.
Kube lengxabangxoza abasekeli beZanu PF laba belwela izikipa ebeziphiwa abaphatheke ekutshengiseleni lokhu mahala.
Your browser doesn’t support HTML5
Yekel'omunye wena uzomdabulela: Abasekeli beZanu PF belwela izikipa eHarare namuhla.
Omunye wabangazitholanga obekhanya ethukuthele nguMnu Peter Mpofu.
“Lathi sifuna amat-shirts, siyahamba njani labanye bewagqokile thina singela? Sifuna ukubukeka sicecile lathi,” kutsho uMpofu ekhuluma leStudio 7.
Lanxa abasakhulayo laba bebesithi bafuna ukhetho olulokuthula, bathe balakho ukuzivikela kumbe ukuphindisela nxa bethe bahlaselwa ngabasekeli bamabandla aphikisayo.
Your browser doesn’t support HTML5
Udaba Siluphiwa nguGibson Bhebhe