Umkhokheli weMDC Alliance uMnu Nelson Chamisa uthi uzimisele ukubumba uhulumende olamalunga amabandla atshiyeneyo agoqela aweZanu PF enganqoba kukhetho ukuze kube lengqubelaphambili elizweni.
Ekhuluma emhlanganweni awenzele eChitungwiza ngoLwesine, uMnu Chamisa uthe kuqakathekile ukuthi kube lokusebenzelana phakathi kwabantu beZimbabwe ukuze ilizwe liphumelele.
Ukhuthaze njalo inkulungwane zabantu abaze kulumhlangano ukuthi bavote ngobunengi ngoMvulo ukuze kususwe iZanu PF embusweni.
Your browser doesn’t support HTML5
Amazwi kaMnu Nelson Chamisa
Omunye okhulume emhlanganweni lo nguMnu Job Sikhala yena oxwayise ibandla leZanu PF ukuthi lingavele liqilibezele kukhetho lizawukhomba olotshwala.
“Lasidlelezela kukhetho sisalomkhokheli wethu uMnu Morgan Tsvangirai kwenela. Lonyaka lingavele lilinge kuyafiwa,” kutsho uSikhala.
Kodwa uChamisa uphange wamqondisa esithi umanyano weMDC Alliance awulufuni udlakela.
Your browser doesn’t support HTML5
Amazwi kaMnu Job Sikhala lakaMnu Nelson Chamisa
Ngokunjalo, uChamisa uthe uzulu kumele avote ngokuthula nhalo aziphathe.
Kunjalo nje, oncintisa kukhetho lokudinga umeli weMagunje edale lephalamende elilunga elizimeleyo uMnu Godfrey Gandawa uthi ucatshile ngemva kokuhlaselwa kwemuli yakhe ngamadoda amane abe hlome ephelele ngoLwesithathu ebusuku esithi adinga yena.
UGandawa uthi abazingeli bakhe bamthole engekho esecatshile ngemva kokuncwetshwa indlebe ukuthi kulabantu beZanu PF abafuna ukumbulala bemethesa icala lokukhuthaza uzulu ukuthi engaze avotela uMongameli Emmerson Mnangagwa.