Amapholisa akoBulawayo ngoMvulo anqolonge intathelizindaba edumileyo uMnu Zenzele Ndebele, ambuzisisa ngefilimu yakhe yeGukurahundi azayethula ngeviki ezayo.
UMnu Ndebele uhambe enkambeni legqwetha lenhlanganiso elwela amalungelo oluntu, eyeZimbabwe Lawyers for Human Rights.
Amapholisa la azame ukwehlukanisa uMnu Ndebele legqwetha lakhe engakakhulumisani laye kodwa ukwalile lokhu uNdebele.
“Bangibuzile ukuthi ifilimu yami imayelana ngani. Ngibachasisele basebesithi bafuna ukuyibona ngingakayethuli,” kutsho uNdebele ekhuluma leStudio 7.
“Ngiyalile ngabatshela ukuthi kabayisiyo Censorship Board bahle baphelelwa. Kodwa ngiyakwazi ukuthi akuphelanga; balakho ukuzama ukungithathela ngenkani.”
UNdebele uke wathwaliswa gadalala ngamapholisa njalo ekwethuleni ifilimu yakhe yakuqala ngombuqazwe weGukurahundi eminyakeni embalwa edluleyo.
Kodwa uthe uzaqhubekela phambili ngokuyethulela umphakathi lifilimu eHarare ngempelaviki ezayo.
Your browser doesn’t support HTML5
Ingxoxo loMnu Zenzele Ndebele