Inhlanganiso ekhankasela ukulondolozwa kwamalungelo oluntu eyeAmnesty International ithi uhulumende kaMongameli Emmerson Mnangagwa wehlulekile ukuthuthukisa ezokuhlonitshwa kwamalungelo oluntu lonyaka.
Linhlanganiso yethule umbiko lo eJohannesburg, kweleSouth Africa, ngoMvulo inanza usuku lweHuman Rights Day. Ilanga leli linanzwa emhlabeni jikelele mhlaka 10 ngoMpalakazi.
Umqondisi weAmnesty International ezansi yeAfrica, uMnu Deprose Muchena, uthe kuyadanisa ukuthi uhulumende kaMnangagwa wehlulekile ukuthuthukisa ezamalungelo oluntu ngendlela ebikhangelelwe nguzulu kulandela ukususwa kukaMnu. Robert Mugabe esikhundleni.
“Yebo siyayizwa inkulumo ethi iZimbabwe ivulekile kwabafuna ukusungula amabhizimusi, kodwa asiboni ubufakazi bokuthi iZimbabwe ivulekile kwezamalungelo oluntu,” kutsho uMuchena.
“Sinxusa-ke uhulumende ukuthi azimisele ekuvikeleni amalungelo oluntu, sithemba ukuthi uMongameli Mnangagwa uzaqinisekisa ukuthi ezamalungelo zivuliwe lazo njengokwenkulumo yakhe kwezamabhizimusi.”
Kodwa umqondisi wenhlanganiso yeCivic Society and Churches Joint Forum, uNkosazana Abigale Mpambi, uthe akavumelani lenhlanganiso yeAmnesty International ikakhulu nxa kuqathaniswa ezamalungelo khathesi langesikhathi kusabusa uMugabe.
“Khathesi kunje abantu bakhululekile bayazikhulumela abakufunayo. Abantu bayachothoza. Kunengi esesikwanisa ukuthi khathesi sikwenze. Uhlupho esesilalo eZimbabwe lapha zindaba ezomnotho, but when it comes to freedoms, hayi abantu bakhululekile,” kutsho uNkosikazi Mpambi.
Your browser doesn’t support HTML5
Udaba Siluphiwa nguBenedict Nhlapho
Kunjalo nje, izihlobo zabantu abanyamalalayo zithi kumele uhulumende ahloniphe amalungelo oluntu ngokugcweleyo.
UNkosikazi Sibongile Chizuze, owanyamalalelwa ngumyeni wakhe ngo2012, uMnu Paul Chizuze, utshele umbuthano wokunanza usuku lwamalungelo lolu eHarare ukuthi ulokhe esizwa ubuhlungu ngoba lanamuhla kakwazi ukuthi umkakhe uyaphila kumbe sowafa.
Amazwi akhe agcizelelwe ngumqondisi wenhlanganiso yeZimbabwe Peace Project, uNkosazana Jestina Mukoko, yena owake wathunjwa ngamaCIO wahlala okwesikhathi eside engazakali ukuthi ungaphi lokuthi usaphila kumbe hatshi.
UMukoko utshele umbuthano lo ukuthi uhulumende weZimbabwe kumele atshiyane lomkhuba wokuthumba lokunyamalalisa abantu angavumelani labo.
Your browser doesn’t support HTML5
Udaba Siluphiwa nguMavis Gama