Ikhomishini eyacwayisisa udaba lodlame olwaqhamuka ngemva kokhetho ithi abantu abayisithupha abafela kuloludlakela babulawa ngamasotsha kanye lamapholisa.
Kumpumela ethulwe nguMongameli Emmerson Mnangagwa ngoLwesibili, ikhomishini le ithe bonke abaphatheka ekubulaweni kwabantu laba kumele bathonisiswe.
Ithe njalo abalimala ngokudutshulwa kumbe ngokutshaywa ngamasotsha lamapholisa ndawonye lababulawelwa izihlobo kumele bahlawulwe nguhulumende.
Ikhomishini le yayikhokhelwa ngowake waba nguMongameli weSouth Africa uMnu Kgalema Motlanthe njalo yakhethwa nguMnangagwa ukucubungula udlakela olwaqhamuka eHarare mhlaka 1 ngoNcwabakazi ngemva kokhetho.
Your browser doesn’t support HTML5
Udaba Siluphiwa nguMavis Gama
Ikhomishini le ikhuthaze uhulumende ukuthi afundise amapholisa ukuqhuba umsebenzi ngendlela ehloniphayo, ehloniphekayo njalo engathathi hlangothi.
Ixwayise njalo uhulumende ukuthi eqakathekise udaba lokuxolelana elizweni kulungisiswe indaba ezihluphayo ezifana lombhuqazwe weGukurahundi.
Ikhomishini le yengeze yathi lanxa ukungenela kwamasotsha ekulwisaneni lodlakela kwenziwa kulandelwa umthetho, kwakungela sidingo sokuthi abulale abantu.
Iphinde yakhuthaza njalo uhulumende ukuthi aqinise ikhomishini ebona ngezamalungelo oluntu abuye aguqule imithetho ephathelane lokhetho.
Isole njalo inkokheli yeMDC isithi yiyo eyaphehla udlakela ngenkuumo yakuthi yayingasoze yamukele impumela yokhetho.
Kodwa uDr Nkululeko Sibanda, isikhulumeli somkhokheli weMDC uMnu Nelson Chamisa ukwalile lokhu esithi akuqondanga.
Your browser doesn’t support HTML5
Ingxoxo loDr. Nkululeko Sibanda
Sixhume njalo isiphathamandla sebandla leZanu PF uMnu Joseph Tshuma.
Your browser doesn’t support HTML5
Ingxoxo loMnu Joseph Tshuma
Ukuhlaziya loludaba sixhume ingcwethi kwezombusazwe uMnu Dinizulu Macaphulana.
Your browser doesn’t support HTML5
Ingxoxo loMnu Dinizulu Macaphulana