Amasotsha lamapholisa ayaqhubeka ngokuhlukuluza uzulu elizweni jikelele njalo ngeSonto adubule omunye umtshayeli womtshova walimala kakubi eHarare.
Ababone lokhu kusenzakala bathi umtshayeli lo udutshulwe ezinyaweni. Imifanekiso esiyibonileyo iveza ikhombi elembhobo zenhlamvu kanye legazi.
Banengi abantu asebebulewe ngamapholisa lamasotsha kulandela udlakela olwaqhamuka ngesikhathi sokukhalala umsebenzi okwakuqoqwe yinhlanganiso yeZCTU ngeviki edluleyo.
Omunye owesilisa obulawe ngamasotsha eMarondera ngeviki edluleyo uMnu Solomon Nyaruwa ungcwatshwe ngeSonto emzini wakhe eChimanimani.
Osakhulayo obeleminyaka yokuzalwa engamatshumi amabili lambili uMnu Tinashe Kelvin Choto, owabulawa ngamasotsha ezidlalela ibhola yena ubekwe ngoMgqibelo.
Amapholisa wona ayaqhubeka ngokuthungatha lokubopha amalunga ebandla leMDC agoqela uNkosazana Thabitha Khumalo.
Your browser doesn’t support HTML5
Ingxoxo loNkosazana Thabitha Khumalo
Amapholisa ahlomileyo ahambe endlini kaMaKhumalo koBulawayo ngeSonto esiyamdinga kodwa amswela.
isiphathamandla sebandla leZanu PF uMnu Believe Gaule utshele iStudio 7 ukuthi lanxa engakusekeli ukuhlukuluzwa kukazulu okwenzakalayo, abantu yibo abaphambanisileyo ngokuqala udlakela lokuntshontsha ezitolo.
Your browser doesn’t support HTML5
Ingxoxo loMnu Believe Gaule