Asemathathu amasotsha asemiswe phambi komthethwandaba kobulawayo phezu kodaba lobudlwangudlwangu obuqhamuke kutshengiselwa phezu kokutshengisela okwenziwe ngeviki edluleyo.
Elinye lamasotsha la ladutshulwa esiswini ngusomabhizimusi lasinda. Kusiyafika izolo kubikwa besokulabantu abangamakhulu amahlanu, 500 ababotshwa koBulawayo ngodaba lokutshengisela lokhu okwatshiya izitolo ezinengi emalokitshini zigqekeziwe ezinye zatshiswa. Izitokisi zakoBulawayo zigcwele osekubangele ukuthi abalokho bebotshwa basiwe ejele leKhami.
Osekudanise amagqwetha alwela ilungelo loluntu yikuthi imithethwandaba ayisebenzi ngokusemthethweni ngoba inengi elibotshiweyo aliphiwa ithuba lokuhlawula imali yesibambiso sebail njalo lamagqwetha abengavunyelwa ukukhulumisana lababotshiweyo laba.
Abanengi sebephange bagwetshwa baphiwa izigwebo ezingahambelani lamacala adalwayo.
Njengesibonelo owatshontsha ikhuba lokulima ngenkomo ugwetshwe ukuhlala okweminyaka emine ejele lona ikhuba intengo yalo ingafiki $100.
Kuthi abanye bagwetshelwe ukupika bephandle kwejele, icommunity service. Lokhu kwenze ukuba amagqwetha phansi kwenhlanganiso yawo eye Zimbabwe Law Society akhulumisane lohulumende ngaloludaba.
Elinye lamagqwetha la, uMnu. Job Sibanda utshele uChris Gande weStudio Seven ukuthi besebeqoqa ukutshengisela kodwa sokusiba ngcono ngoba abanye sebephiwa ibail.
Your browser doesn’t support HTML5
Ingxoxo loMnu. Job Sibanda