Kuqhamuke ingxabangxoza edale lephalamende ngoMvulo lapho amalunga ekomidi ebona ngezemigodi amabili aphose atshayana khona.
UMnu Dexter Nduna, olilunga lebandla leZanu PF loMnu Temba Mliswa, olilunga elizimeleyo, bathethisene ngemva kokuba uMnu Mliswa ethese uNduna icala lobusela.
Lokhu kucunule uNduna wethusele ukubulala uMliswa esithi uvele ungumbulali osowabulala abantu abanengi kwathi uMliswa yena waphendula esithi uNduna angavele emfake isandla uzamthena abe yinkabi.
Ikomidi le iphakathi kwengxabangxoza enkulu ngoba kulamalunga ayo agoqela yena uMliswa etheswa umlandu wenkohlakalo.
UNduna ngumuntu ovele esetheswa amacala okubulala kanye lokwethusela ukudubula amalunga eMDC edale lephalamende.
Igcwethi kwezombusazwe uMnu Effie Dlela Ncube utshele iStudio 7 ukuthi okwenziwe nguNduna yinto engelasithunzi njalo uthi kumele ecwayisiswe lidale.
Your browser doesn’t support HTML5
Ingxoxo loMnu Effie Dlela Ncube