Abakhokheli bamabandla aphikisayo abaqale ukukhulumisana loMongameli Emmerson Mnangagwa ngoZibandlela bahlangane labameli bakaMnangagwa ngoLwesihlanu babumba amakhomithi amane azadlala indima ezitshiyeneyo enkulumeni lezi.
Enye yamakhomithi la iphiwe umlandu wokudinga umlamulankunzi olilunga elizimeleyo ozakhokhela inkulumo lezi kuthi enye izakhangela izinqumo eziyabe zithethwe.
Amakomithi la azaqala ukukhulumisana mhlaka 1 ngenyanga ezayo. Abaphatheke emhlanganweni lo bagoqela umkhokheli weMDC-T uNkosazana Thokozani Khupe, uMnu Nkosana Moyo labanye.
Umkhokheli webandla leBuild Zimbabwe uMnu Noah Manyika kayanga emhlanganweni wangoLwesihlanu lanxa wayehambile emhlanganweni wakuqala.
Embikweni awethulele abezindaba, uMnu Manyika uthe ukukhulumisana okungelamkhokheli weMDC uMnu Nelson Chamisa yikudlala ngesikhathi.
Ngokunjalo, uManyika uthe kasoze aphatheke enkulumeli ezitshiya uChamisa phandle.
UMnu Chamisa lebandla lakhe banxuswa nguMnangagwa kulezinkulumo kodwa bayala ukuhamba besithi bafuna zikhokhelwe ngumuntu ozimeleyo, hatshi uMnangagwa.
Sixoxe lomgcinisihlalo weMDC-T uMnu Abednico Bhebhe, yena ophatheke emhlanganweni wangoLwesihlanu wasichasisela okunengi.
Your browser doesn’t support HTML5
Ingxoxo loMnu Abednico Bhebhe