Umanyano weEuropean Union ngoLwesibili uphe uhulumende weZimbabwe, oweMalawi loweMozambique imali engange$3, 97 million eqondane lokuphathisa abahlaselwe lizulu lesiphepho, uCyclone Idai.
IMelika yona ithi iphakathi kokuqoqa olwayo uncedo ezaluthumela emazweni womathathu maduze. EleBhilithane lona liphe amazwe la imali engena ku£6 million.
UMongameli Emmerson Mnangagwa uthi amazwe afana leleTanzania, eleUnited Arab Emirates, eleSouth Africa leleBotswana lawo sethembise ukuthumela uncedo olutshiyeneyo eZimbabwe.
Uzulu weZimbabwe laye uqhubeke ethumela izipho ezifana lezigqoko, ingubo lokudla ebantwini abawelwe yilingozi ngoLwesibili.
Ugatsha lukahulumende weZimbabwe olubona ngezemali lona luthi solubeke eceleni i$50 million yokuthengela abantu laba indingeko ezitshiyeneyo.
Umqondisi wenye yenhlanganiso eziqoqa uncedo lolu eyeMethodist Development and Relief Agency uMnu Clever Owen Tabaziba utshele iStudio 7 ukuthi lanxa sebetholatholile impahla etshiyeneyo, basasilela ngemali.
Your browser doesn’t support HTML5
Ingxoxo loMnu Clever Owen Tabaziba