Umsekeli kamgcinisihlalo weMDC uMnu Job Sikhala, yena obekhangelelwe ukumiswa emthethandaba weHarare izolo esetheswa icala lokutshotshozela ukugenqulwa kukahulumende, usezamiswa phambi kukamantshi eMasvingo namuhla.
USikhala ubotshwe ngoLwesibili phezu kwamazwi awethule ngempelaviki awokuthi iMDC izagenqula uMongameli Emmerson Mnangagwa embusweni ukhetho luka2023 lungakafiki.
Amagqwetha kaSikhala akhala ngokuthi avinjiwe ukumbona izolo amapholisa amhambisa eMasvingo engawazisanga.
Abasekeli beMDC bona bake betshengisela phambi komthethwandaba weHarare izolo besola ukubotshwa kukaSikhala lonobhala jikelele wogatsha lwabatsha uMnu Gift Ostalos Siziba yena owetheswa icala lokutshotshozela udlakela.
USiziba yena ukhangelelwe ukumiswa emthethwandaba weHarare namuhla.
Bayedlula amatshumi amabili asebebotshiwe lonyaka ngecala lokuqoqa ukuvukela umbuso kaMnangagwa.
UNtungamili Nkomo weStudio 7 uxoxe lelunga lebandla leMDC, uNkosazana Kimberly Bhebhe.
"USikhala loSiziba babotshwe ngoba kade bekhuluma indaba zokukhipha uhulumende. Bakhuluma umbono wabo ngoba abantu bayadubeka and vele siyakwazi ukuthi ngabantu abaku opposition party," kutsho uBhebhe.
Your browser doesn’t support HTML5
Ingxoxo loNkosazana Kimberly Bhebhe