Umeya wakoBulawayo uMnu Solomon Mguni usebuyisele umabhalane kamasipala walelidolobho uMnu Christopher Dube emsebenzini kulandela ukuxotshwa kwakhe uMguni engekho.
UMnu Dube umiswe umsebenzi ngumsekeli kaMguni, uMnu Tinashe Kambarami, emethesa amacala agoqela elenkohlakalo lelokwehluleka ukulungisa uhlupho lwamanzi.
UMguni, yena ephandle kwelizwe, utshele umphathi wenhlelo ezitshiyeneyo uNkosikazi Sikhangele Zhou ukuthi alobe incwadi eveza ukuthi uDube kumele abuyele emsebenzini ngoba engamiswanga ngokusemthethweni.
UDube yena uxolisile kuzulu phezu kwevideo lapho aphume khona ekhihliza inhlamba eyiqondise kuKambarami emthuka ngonina ngoLwesithathu.
Uthe wenze lokhu ethukuthele. Wengeze wathi lanxa ebengekho emsebenzini ngoLwesihlanu, ukhangelele ukubakhona ngoMvulo.
Your browser doesn’t support HTML5
Ingxoxo loMnu Christopher Dube
Kodwa uKambarami utshele iStudio 7 ukuthi isinqumo sakhe sokumisa uMnu Dube umsebenzi sisemthethweni njalo lokhe sisebenza.
Wengeze wathi yena lamanye amakhansila amabili uMnu Silas Chigora loMnu Felix Mhaka batshayiwe ngabantu ababangenele emhlanganweni wekhansili ngoLwesihlanu bawuchithachitha.
Your browser doesn’t support HTML5
Ingxoxo loMnu Tinashe Kambarami
UMnu Kambarami, yena ohambe wayamangala emapholiseni, ubephuma igazi ezandleni lapho athi usikwe khona ngamagilasi ngesikhathi bedudulwa ngabantu laba.
Abantu laba babikwa beyizakhamizi ezikucele likaMnu Dube, ngokubika kwentathelizindaba yethu uBathabile Masuku.
Your browser doesn’t support HTML5
Udaba Siluphiwa nguBathabile Masuku
Ukuhlaziya loludaba sixhume igqwetha uMnu Matshobana Ncube, yena othi uKambarami wenze into engekho emthethweni, yikho nje uMguni embuyisele uDube emsebenzini.
Your browser doesn’t support HTML5
Ingxoxo loMnu Matshobana Ncube