Abadlali beqembu leZimbabwe emdlalweni we-cricket abayisithupha bazaphatheka kumncintiswano walonyaka oweSpar Bonsa Cricket T20 League oqala ngoMgqibelo.
Laba badlali bagoqela uChris Mpofu, yena ozadlalela iqembu leFastjet Badgers, uSikandar Raza, yena ozadlalela iqembu leMermaids Pools Blazers, uSean Williams ozadlalela iqembu leCanela Sabers, uBrandon Taylor, yena ozadlalela iqembu lePepsi Hawks, uCraig Ervine ozadlalela iqembu leFazak Power Raptors kanye loAinsley Ndlovu, ozadlalela iqembu leNational Fencing Tyres.
Umqondisi womncintiswano weSpar Bonsa T20 Cricket League uDuncan Foster uthe ukhangelele ukuba umncintiswano walonyaka ube ngothokozisayo ukwedlula owanyakenye.
“Silabadlali abangamatshumi ayithobamunwemunye njalo iqembu ngalinye lilomdlali odlalela iqembu lesizwe kanye labasakhulayo ababili abaleminyaka engaphansi kwelitshumi lathobamunwemunye,” kutsho uFoster.
Wengeze wathi lonyaka kulenguquko kundlela okudlalwa ngayo ngoba imidlalo izabe idlalwa ngoMgqibelo langeSonto ikanti nyakenye bekudlalwa ngeSonto kuphela.
Iqembu leBlazers yilo eliphakamise isicoco nyakenye, obekungumnyaka wakuqala lumncintiswano uqhutshwa.
Limidlalo izaqhutshelwa endaweni yeOld Mutual Heath Streak Multi Sports Academy.
Ngakwelinye icele, iqembu ebelimele ilizwe kumncintiswano weNetball World Cup seliphendukile ekhaya livela kweleNgilandi lapho obekuqhutshelwa khona imidlalo le.
Lumncintiswano ubungenwe ngamaqembu alitshumi lesithupha njalo iqembu leZimbabwe elaziwa kakhulu ngegama elithi Gems liphutshe lisendaweni yethobaminwemibili.
Limpumela ithokozise uzulu weZimbabwe njengoba bekungokwakuqala ukuba iqembu leli liphatheke kulimidlalo.
Iqembu leli belisidla ingqweqwe zomlomo ngesikhathi lilungiselela lumncintiswano kodwa iziphathamandla zikahulumende zithembise ukuba abadlali laba bazabongwa ngokuphakamisa abakwenze igama lelizwe.
Your browser doesn’t support HTML5
Udaba Siluphiwa nguJoseph Njanji