UMongameli Emmerson Mnangagwa ngoLwesihlanu wethule umbiko wesimo selizwe, iState of the Nation Address lapho athe ikusasa yelizwe ikhanya imhlophe kulandela athi yikuphumelela kwenhlelo zakhe.
UMnangagwa uthe okunye okupha ubufakazi bokuthi ilizwe liyathuthuka yimbiko yebhanga le World Bank.
“Ngikhuluma nje inhlanganiso ye world bank isikhuphule isimo sethu ngokusikhuphula kuluhlu lwamazwe alomnotho omncane yasisa kulawo alomnotho othe xaxa,” kutsho uMnangagwa.
UMnangagwa uthe inhlelo zikahulumende wakhe ezokuvusela umnotho welizwe seziqalisile ukuletha izietho ezingakaze zibonkale kuminyaka eminengi esanda kwedlula.
“Okwakuqala ngemva kwesikhathi eside uhulumende wenelisile ukusebenzisa imali ngemfanelo kwaba lemali esala ingasetshenziswanga. Siyabonga amazwe angaphandle komanyano we Africa Union asiphathisayo abalisa ele China, Russia, India, Belaruse, Spain le Brazil,” kutsho uMnangagwa.
UMnangagwa uthembise umbuso okhululekileyo esithi lokhu kuzenziwa ngokusemthethweni.
“Ngikhuluma nje imithetho emibi eminengi siyayisusa sifaka emihle ukuze ihambelane lesisekelo sombuso ahambelane lombuso okhululekileyo,” kutsho uMnangagwa.
Kodw olwela ilungelo lezakhamizi zesigaba seMatabelaland lenkabazwe, uMnu. Mbuso Fuzwayo, owenhlanganiso ye Ibhetshu Likazulu uthi amazwi kaMnangagwa la awathembisi ngoba ezwakala ingani ngawokududuza abasekeli bakhe nje kuphela.