Umqeqetshi omutsha oweqembu le Highlanders uHendrik Pieter de Jongh ufike koBulawayo ngeSonto ntambama kodwa akasoze ahle awudumele umsebenzi owokuba ngumqeqetshi weqembu leli njengoba kumele eqale athole amaphepha amvumela ukuba uselayo imvumo eyokusebenza e Zimbabwe.
Ngalokho ke umqeqetshi uMandla Mpofu okunguye obephiwe isikhundla sika mqeqetshi weqembu le Highlanders ngemva kokutshiya kuka Madinda Ndlovu nguye olokhu ezibambile kuqembu.
UMpofu utshele intathelizindaba zemidlalo ukuba bakhangelele ukunqoba emdlalweni wabo abazawudlala ngoLwesithathu leqembu le Bulawayo Chiefs.
“Siqale kubi kakhulu okokuthi okwakhathesi asingeke sibe sisakuthola lokhu ebesikukhangelele.
Ngibona khathesi kumidlalo eseleyo kumele abafana bedlale ukwenzela ukuthi sibone ukuthi iqembu le Highlanders lizakwala lilokhu likusigaba se Premier Soccer league,” kutsho uMpofu.
Iqembu le Highlanders lizadibana lele Bulawayo Chiefs emdlalweni wamaqembu amabili aphuma edolobheni lako Bulawayo njalo abhekane lengozi eyokugunyulwa kusigaba saphezulu ngoba ehlezi phansi kwengalane yemiklomelo.
Iqembu le Bulawayo Chiefs, okuyilo eliyabe lisekhaya ngoLwesithathu, lihlezi endaweni yesibili nxa usuka ngaphansi kwengalane, lilemiklomelo engamatshumi amabili lowodwa, kuthi ele Highlanders lihlezi endaweni yetshumi lantathu, lilemiklomelo engamatshumi amabili lanhlanu.
Lumdlalo wangoLwesithathu uzakupha umqeqetshi omutsha weqembu le Highlanders ithuba elokuba ababone abafana be Bosso bedlala okungamphathisa ukuba alungise inhlelo ezokuba abaqeqetshe njani ngesikhathi elindele ilungelo elokuba asebenze kwele Zimbabwe.
Komunye umdlalo ozadlalwa edolobheni lako Bulawayo ngoLwesithathu iqembu le Chicken Inn lizemukela ele Herentals enkundleni ye Luveve.
Emidlalweni yesigaba se Castle Lager Premier Soccer League edlalwe ngempelaviki eyedluleyo iqembu le FC Platinum lidlalise ithuba elokuba libuyele liyehlala phezu kwengalane ngemva kokuba ngutshiki lobhanqa 0 ka 0 leqembu le Mushowani Stars ikanti ele Yadah linqobe ele Triangle age 3 ka 2.
Kusenjalo iqembu elimela ilizwe le Zimbabwe emdlalweni wenguqu elama Warriors linqobe ele Lesotho nge 3 ka 1 kuhlandla lakuqala elomdlalo wokudinga amaqembu azakuyaphatheka kumidlalo ye Africa Nations Championship ezaqhutshelwa elizweni lase Cameroon ngomnyaka ozayo.
Limpumela itsho ukuba iqembu le Zimbabwe lizifake esimeni esihle esokuyaphatheka kulimidlalo edlalwa ngabadlali abadlala besekhaya kuphela.
Kolunye udaba olumayelana lomdlalo wenguqu iqembu le Bulawayo City Under 20 yilo eliphakamise inkezo yakuqala eye ZIFA Bulawayo Province Cup ngemva kokunqoba iqembu le Biya and Friends Academy emdlalweni oqhutshelwe enkundleni ye Luveve ngeSonto.
Iqembu le Bulawayo City Under 20 linqobe nge 2 ka 1 ku final edlalwe ngamaqembu adlala kusigaba sika Division three loba nje lumncintiswano ubungenwe langamaqembu adlala lakusigaba sika Division two.