Sokulokudonselana kuZanu PF phezu kodaba lokuthi ibandla leli kumele lenzeni ngezindlu elazakhela umuyi, uMnu Robert Mugabe ezigoqela lapho abehlala khona lemuli yakhe, eBlue Roof.
Yikho osekusele kuhlala umkakhe labantwababo abangabafana, uRobert Junior loChatunga.
Omdala, uBona yena uhlala kwenye njalo indlu okuthiwa ngeyeZanu PF esemzini wezipatsha eBorrowdale.
Lanxa umsakazo weZBC ubike izolo ukuthi umabhalane obona ngokuqhutshwa kwenhlelo zeZanu PF uMnu Obert Mpofu ubethe ibandla lakhe lizathatha iBlue Roof liyiphendule ibe yindlu egcina imbali, kumbe imuseum, ugatsha olubona ngokwethulwa kwemibiko luphange lwakulandula lokhu.
UMnu Mpofu ubikwa ebesithi njalo balakho ukuyithatha lindlu bayisebenzise ngendlela ezalethela iZanu PF imali.
Kodwa ugatsha olubona ngokwethulwa kwemibiko luyilandule limbiko lusithi indlu le, yona esebizweni leZanu PF lezinye, zizaphiwa imuli kaMugabe njengokuthembisa kukaMongameli Emmerson Mnangagwa.
UMpofu yena utshele iStudio 7 ukuthi sebelulungisile loludaba: "Loludaba lusakhangelwa ngabadala bazathi sebethatha inyathelo."
Kambe kuyini kahle-kahle okwenzakalayo lapha?
UNtungamili Nkomo weStudio 7 uxoxe locubungula ezobusazwe uMnu Bekezela Maduma Fuzwayo.
"Lokhu sokusibonisa mhlophe ukuthi indaba ye factionalism ayipheli ku Zanu PF and kukhanya ngokufa kuka Mugabe isizakuba worse kathesi," kutsho uFuzwayo.
Your browser doesn’t support HTML5
Ingxoxo loMnu. Bekezela Maduma Fuzwayo