Uzulu weZimbabwe ukhala ngokuthi uzadlalela ikhisimusi yalonyaka emnyameni ngenxa yokusilela kwamandla kagetsi okuqhubekayo.
Inkampani yeZESA Holdings yazise kuliviki ukuthi izaqhelisa isikhathi ecitsha ngaso amagetsi singene kulanga lonke kuhlanganisela ubusuku lemini kwezinye insuku.
Inkampani le ithi ithethe intathelo leli ngoba ilizwe lithola amagetsi amalutshwana kwamanye amazwe njalo lingenelisi ukuphehla aneleyo.
Lanxa uhulumende esithi usebenza gadalala ukuqeda loludubo, umabhalane obona ngenhlelo zamandla kagetsi kubandla leMDC uNkosikazi Jasmine Toffa, olilunga ledale lephalamende, uthi akakuboni ukuzimisela kukahulumende kulokhu.
Uthi njalo uhulumnde kumele asebenzise imali ayitholayo kunhlelo zokwemba amatshe aligugu ukulungisisa udaba lolu.
Your browser doesn’t support HTML5
Ingxoxo loNkosikazi Jasmine Toffu
Kusenjalo, eleSouth Africa, lona elithengisela eleZimbabwe amandla kagetsi, lalo selihlaselwe ludubo olufanayo osolutshiye inengi lisebunzimeni obukhulu.
Uzulu ukhala ngokuthi incingo zikamakhelekhukwini kazisabambi kuhle amagagasi kanti njalo eminye imisebenzi eminengi edinga amagetsi isimile.
Amagetsi acitshwa okwamahola amanengi kuthi kwesinye isikhathi ahamba okwamalanga. Lokhu sokusenza inengi lithi umumo lo ulakho ukufana loweZimbabwe.
Isizalwane seZimbabwe esihlala kweleSouth Africa, uMnu George Mkhwananzi, oyingcwethi kwezombusazwe utshele iStudio 7 ukuthi mubi kakhulu umumo kulelolizwe.
Your browser doesn’t support HTML5
Ingxoxo loMnu George Mkhwananzi
Enye njalo ingcwethi kwezombusazwe uMnu Mqondobanzi Magonya uthi kuyadanisa ukuthi uzulu uzadlalela ikhisimusi phakathi kokusilela kwamagetsi, ukudula kwezinto lokusilela kwamafutha ezimota lemali emabhanga.
Your browser doesn’t support HTML5
Ingxoxo loMnu Mqondobanzi Magonya