Ibhanga elikhulu lelizwe eleReserve Bank of Zimbabwe (RBZ) lithi imali entsha ebalisa iZ$10 yephepha ebambeneyo izaqala ukusebenza ngeviki ezayo ngoLwesibili mhlaka 19 kuthi iZ$20 yona izakwethulwa kuviki yakuqala ngenyanga elandelayo.
Embikweni awethule ngoLwesihlanu usibalukhulu weRBZ uMnu John Mangudya wazise njalo ukuthi kuqala mhlaka 19 amabhanga azakhuphula imali umuntu avunyelwa ukuyithatha ebhanga ngeviki isuka kuZ$300 isiya kuZ$1,000.
I-Z$10 leZ$20 ezintsha lezi zizasebenza ndawonye leZ$2 leZ$5 ebezivele zikhona.
Imali le idindwe ngenye inkampani yakweleGermany njalo ifike elizweni ngendizamtshina ngoLwesine. I-Z$10 ilombala obomvu kuthi iZ$20 yona ilombala oyisibhakabhaka.
Ingcwethi kwezenotho zithi uhulumende wethule imali yamanani aphezulu le ngoba iZ$2 leZ$5 kazisathengi lutho.