Umthethwandaba weHigh Court namuhla ukhangelelwe ukuhluza udaba lokuthi ibandla leMDC-T lilelungelo na lokuxotshisa amalunga eMDC Alliance edale lephalamende.
Loludaba belumele luthethwe ngoMvulo kodwa lwadluliselwa phambili.
Ibandla leMDC Alliance likhweze udaba lolu enkantolo ngemva kokuxotshiswa kwamalunga alo amane ngumkhokheli weMDC-T, uNkosazana Thokozani Khupe kumaviki ambalwa edluleyo.
Umkhokheli weMDC Alliance uMnu Nelson Chamisa uthi uMaKhupe kalalungelo lokuxotshisa amalunga ebandla lakhe.
Kulandela isehlakalo lesi, iMDC Alliance yaphuma lesinqumo sokuthi amalunga ayo kaseyikuqhubeka esiya ephalamende ngendlela yokukhonona phezu kokuxotshwa kwamanye awo.
Izolo kulelunga elilodwa kuphela lalelibandla elihambe edale lephalamende, uNkosikazi Winnie Kankuni.
Kudale leSenate khona kuhambe abayisithupha abagoqela uMnu Douglas Mwonzora, uMnu Morgen Komichi loMnu Elias Mudzuri, bona asebaxotshwa kuMDC Alliance.
Isikhulumeli sikaNkosazana Thokozani Khupe uMnu Khaliphani Phugeni utshele umsakazo weStudio 7 ukuthi inkokheli yebandla lakhe izahlala phansi ikhulumisane ngamalunga eMDC Alliance ala ukuya ephalamende.
Your browser doesn’t support HTML5
Ingxoxo loMnu Khaliphani Phugeni