Ikhomishini ebona ngokulondolozwa kwamalungelo oluntu ithi uphenyo esilwenzile luveza ukuthi ngempela iziphathamandla zebandla leMDC Alliance ezintathu ezibalisa umeli weHarare West edale lephalamende uNkosazana Joana Mamombe, uCecilia Chimbiri loNetsai Marova bathunjwa bahlukuluzwa ngendlela ehlisa isithunzi.
Embikweni ewethule izolo ntambama, iZimbabwe Human Rights Commission (ZHRC) ichothoze amapholisa isithi kumele atshiyane lokwephula amalungelo oluntu njalo ithe kumele adingisise udaba lolu kabanzi ukuze kubotshwe labo abathumba abesifazana laba.
Ikhomishini le ithe okwenzakale kuMamombe labanye bakhe yikwephula amalungelo abo kanye lesisekelo sombuso welizwe.
Yengeze yathi kwakungamelanga bahlukuluzwe lanxa bengabe bephula umthetho ngokutshengisela ngesikhathi inengi likhuthazwa ukuhlala ezindlini emizameni yokwenqabela ukumemetheka kweCoronavirus.
IZHRC ithe kumele idale lephalamende liphume lomthetho ozasungula ugatsha oluzaphatha izikhalazo zabantu abayabe bethe bahlukuluzwa ngabezomvukela.
Ithe njalo kumele uhulumende asayine umthetho wamazwe omhlaba onqabela ukuhlukuluzwa kwabantu oweUN Convention Against Torture.
Umbiko walikhomishini iza ngesikhathi umphathintambo wendaba zasekhaya uMnu Kazembe Kazembe esithi uselaye usikomitshi wamapholisa ukuthi aphenye udaba lolu kabanzi.
Uza njalo ngesikhathi ezinye iziphathamandla zikahulumende zisala ukuthi uMamombe labanye bakhe bathunjwa njalo bahlukuluzwa.
Abesifazana beMDC Alliance laba bathi bathathwa ezandleni zamapholisa ayebabophile ngabantu abangabaziyo ababehlome ngemibhobho bayabatshaya njalo abanye babo badlwengulwa.
Bathi njalo badliswa ingcekeza yomuntu banathiswa lomchemo.
Olwela amalungelo oluntu uMnu Bekezela Maduma Fuzwayo utshele iStudio 7 ukuthi yinto enhle kakhulu ukuthi ikhomishini yamalungelo iyakufakaza ukuthi uMamombe labanye bakhe bathunjwa.
Your browser doesn’t support HTML5
Ingxoxo loMnu Bekezela Maduma Fuzwayo
Ingcwethi kwezombusazwe uMnu Effie Dlela Ncube yena uthi lanxa evumelana leZimbabwe Human Rights Commission, kaboni amapholisa kumbe uhulumende belandela inkuthazo yalikhomishini.
Your browser doesn’t support HTML5
Ingxoxo loMnu Effie Dlela Ncube