Amazwe angentshonalanga izolo achothoze uhulumende ngokuqhubeka esephula amalungelo oluntu kulandela ukuthunjwa lokuhlukuluzwa kweziphathamandla zebandla leMDC Alliance ezintathu kanye labesifazana bakoBulawayo ababili abatshaywa ngamapholisa balimala kakubi.
Amazwe agoqela eleMelika, eleBhilithani, eleFrance, iGermany, iGreece, iItaly lamanye amanyene ethula umbiko okhuthaza uhulumende ukuthi adingisise ngokuthunjwa kwabesifazana beMDC abathi uNkosazana Joana Mamombe, uCecilia Chimbiri loNetsai Marova njalo abophe labo ababathumbayo.
Athe njalo amapholisa etheswa umlandu wokutshaya izelamani zakoBulawayo uNkosazana Nokuthula loNtombizodwa Mpofu kumele ajeziswe.
Isiphathamandla senhlanganiso elwela amalungelo abesifazana eyeWoza, uNkosazana Magodonga Mahlangu utshele iStudio 7 ukuthi bakhathazekile kakhulu ngezehlakalo zokwephulwa kwamalungelo, ikakhulu ngamapholisa.
Your browser doesn’t support HTML5
Ingxoxo loNkosazana Magodonga Mahlangu
Olwela amalungelo oluntu uMnu Difa Dube yena uthe ukuqhubeka kukahulumende esephula amalungelo kazulu kubuyisela ilizwe emuva.
Your browser doesn’t support HTML5
Ingxoxo loMnu Difa Dube
UMongameli Emmerson Mnangagwa uyakulandula ukuthi uhulumende wakhe kahloniphi amalungelo oluntu.