Inhlanganiso zamagqwetha ezigoqela iLaw Society of Zimbabwe leYoung Lawyers Association of Zimbabwe sezisole ukubotshwa kwamagqwetha ayisithupha kunsukwana ezedluleyo zisithi le yindlela kahulumende yokuzama ukwethusela amagqwetha alwela amalungelo kazulu.
Inhlanganiso lezi zethule amazwi la kulandela ukumiswa enkantolo kwamagqwetha amabili ngoMvulo, uMnu Tapiwa Makanza loMnu Joshua Chirambwe besetheswa icala lokuvimba isandla somthetho elibotshelwe uMnu Thabani Mpofu, oligqwetha lomkhokheli webandla leMDC Alliance, uMnu Nelson Chamisa, ngeviki ephelileyo.
UMakanza loChirambwe bakhululwe ngumantshi ngemva kokubahlawuliswa inkulungwane zamadola ezingamatshumi amabili, Z$20,000 yesibambiso, i-bail, umuntu ngamunye.
Abatshutshisi bathi ababili laba loMnu Mpofu badala icala ngokuzibazela umamangala ongekhoyo, uSimbarashe Zuze, kudaba lokuphikisa ukukhethwa kukaMnu Kumbirai Honzi ukuba ngumtshutshisi omkhulu kahulumende.
Kodwa uZuze, oyisakhamuzi sakoBulawayo uphume ngeSonto ezikhulumela ukuthi ungumuntu okhona njalo efakaza ukuthi nguye owahambisa udaba lukaHonzi emthethwandaba.
Amanye amagqwetha amabili ekade engabasolwa kuloludaba ndawonye loMpofu, uMakanza loChirambwe, uNkosikazi Choice Daniso loMnu Lawman Chimuriwo babikwa sebengabafakazi bakahulumende.
NgoMgqibelo kubotshwe elinye njalo igqwetha elilwela amalungelo oluntu koBulawayo, uMnu Dumisani Dube, laye wetheswa icala lokuvimba isandla somthetho kolunye udaba olwehlukileyo.
Laye uphange wakhululwa nge-bail.
Kodwa isiphathamandla senhlanganiso yeYoung Lawyers Association of Zimbabwe, uMnu Jabulani Ndlovu, utshele iStudio 7 ukuthi kusobala kubo ukuthi uDube laboMpofu babotshwe nje ngoba bengamagqwetha alwela amalungelo kazulu.
Your browser doesn’t support HTML5
Ingxoxo loMnu Jabulani Ndlovu
Amazwi kaNdlovu agcizelelwe yingcwethi ecubungula ezombusazwe, uMnu Effie Dlela Ncube.
Your browser doesn’t support HTML5
Ingxoxo loMnu Effie Dlela Ncube
Imizamo yokukhuluma lesikhulumeli sikahulumende uNkosazana Monica Mutsvangwa lesikhulumeli samapholisa, uMnu Paul Nyathi, yehlule ngoba bebengadobhi incingo zabo.