Umanyano weUnited Nations ngoLwesithathu usole ukuthunjwa lokuhlukuluzwa kwabesifazana beMDC Alliance abathathu usithi uhulumende weZimbabwe kumele esule icala abethesa lona njalo atshiyane lokwephula amalungelo oluntu.
Uthe njalo uhulumende kumele ajezise abantu abathumba abesifazana laba, abathi umeli weHarare West ephalamende uNkosazana Joana Mamombe, uCecilia Chimbiri kanye loNetsai Marova.
Abathathu laba bathi bathunjwa besezandleni zamapholisa bayatshaywa njalo bahlukuluzwa ngokocansi.
Ngemva kokuthunjwa lokutshaywa kwabo, betheswe icala lokwephula iziqondiso zokwenqabela ukumemetheka kweCoronavirus ngokutshengisela ngaphandle komthetho.
NgoLwesithathu baphinde babotshwa njalo okwesibili besetheswa icala lokuqamba amanga ukuthi bathunjwa.
Embikweni wako, iUnited Nations ithe ukuthunjwa kwabathathu laba akumangalisi ngoba kulabantu abangamatshumi amane lasitshiyagalolunye, 49, abathunjwe bahlukuluzwa ngendlela ezitshiyeneyo eZimbabwe nyakenye.
IUN ikusolile kakhulu lokhu isithi uhulumende kaMongameli Emmerson Mnangagwa kumele avikele abesifazana lamalungelo oluntu jikelele.
Umbiko lo uza ngesikhathi uhulumende eqhubeka ngokubopha amagqwetha alwela amalugelo ngezizatho ezitshiyeneyo.
NgoLwesithathu khona kubotshwe igqwetha elilobudlelwano lebandla leMDC Alliance uMnu Sylvester Hashiti wetheswa icala leCriminal Insult.
Isiphathamandla senhlanganiso yeYoung Lawyers Association of Zimbabwe uMnu Jabulani Ndlovu utshele iStudio 7 ukuthi bakhathazekile kakhulu ngokwephulwa kwamalungo amagqwetha lakazulu jikelele nguhulumende weZanu PF.
Your browser doesn’t support HTML5
Ingxoxo loMnu Jabulani Ndlovu
Umphathintambo obona ngokwethulwa kwemibiko uNkosikazi Monica Mutsvangwa uthe amagagasi akhe ebengabambi kuhle, ngakho ubengenelisi ukukhuluma lathi.
Kodwa isiphathamandla sebandla lakhe leZanu PF uMnu Believe Gaule uyakulandula ukuthi uhulumende wephula amalungelo kazulu.
Your browser doesn’t support HTML5
Ingxoxo loMnu Believe Gaule