Ababalisi bathi ukwengezwa kweholo labo nguhulumende izolo akutsho lutho ngoba imali asebeyihola ilokhu ingenelisi ukubaphilisa kanye lemuli zabo.
Umphathintambo wezemali uMnu Mthuli Ncube wazise ukuthi izisebenzi zikahulumende sezikhwezelwe iholo ngesilinganiso sokungamatshumi amahlanu ekhulwini, 50 percent, njalo zizahlawulwa imali eqondane lengozi yomkhuhlane weCoronavirus, iCovid-19 Allowance, engamadola angamatshumi ayisikhombisa lanhlanu eMelika, iUS$75 ngenyanga.
UNcube uthe njalo abake basebenza kuhulumende asebathatha impentsheni bazabhadalwa iUS$30 ngenyanga.
Uthe lokhu bazakwenza okwenyanga ezintathu ezilandelayo besakhulumisana lezisebenzi phezu kweholo.
Inyathelo leli lize ngesikhathi abongi betshengisela eHarare izolo bekhala ngeholo eliphansi.
Isiphathamandla senhlanganiso emela ababalisi bemaphandleni iAmalgamated Rural Teachers Union of Zimbabwe (ARTUZ) uNkosazana Melissa Chingwanangwana uthi bafuna ababalisi baholiswe imali engange US$520 ababeyihola ngo2017.
Your browser doesn’t support HTML5
Ingxoxo loNkosazana Melissa Chingwanangwana
Esinye njalo isiphathamandla salinhlanganiso uMnu Nation Mudzitirwa utshele iStudio 7 ukuthi bazatshengisela ngoMvulo phezu kodaba lolu.
Your browser doesn’t support HTML5
Ingxoxo loMnu Nation Mudzitirwa