Uhulumende uthi imingcele yelizwe evalwe ekuqhamukeni komkhuhlane weCovid-19 ngoMbimbitho izavulwa mhlaka 1 ngoMpalakazi. Idale labaphathintambo eleCabinet liphume lesinqumo lesi izolo.
Unobhala kugatsha lokwethulwa kwemibiko uMnu Nick Mangwana uthi abantu abahamba ngezimota zabo kanye labahamba ngezinyawo yibo abazavunyelwa ukungena lokuqhuma elizweni kuqala imingcele le ingavulwa.
Uthi njalo abamabhasi lezinye izimota ezithwala umphakathi bazalandela. UMongameli Emmerson Mnangagwa laye wethule umbiko esithi ubonga uzulu jikelele ngokulandela iziqondiso zokwenqabela ukumemetheka komkhuhlane weCovid-19. Uthi lokhu kulondoloze impilo zabantu abanengi.
UMnangagwa uthi khathesi sokuyisikhathi sokuthi abantu babambane bavuselele umnotho.
Lanxa abanye besithi ukuvulwa kwemingcele lokhu kulakho ukubangela ukumemetheka kwegciwane leCoronavirus, abanye bathi abakuboni ngaleyo ndlela.
UNtungamili Nkomo weStudio 7 uxoxe lesiphathamandla senhlanganiso yabantu abazisebenzayo ebivele ikhuthaza ukuvulwa kwemingcele iBulawayo Vendors and Traders Association uMnu Michael Mdladla Ndiweni.
Your browser doesn’t support HTML5
Ingxoxo loMnu. Michael Mdlala Ndiweni